收藏文章 

2017-08-18

暑假應酬多 吳永嘉爆曾智明千杯不醉未驚過

  立法會仲放緊暑假,不過議員嘅應酬就冇暑假呢回事,尤其是工商界、功能組別嘅議員,因為業界永遠有數不盡嘅專業議題同佢哋傾。好似立法會工業界(二)嘅吳永嘉(Jimmy)咁,佢呢兩日至少要去五個飯局。

 

 

Jimmy(左二)好專心咁聽緊中聯辦副主任譚鐵牛(左一)致辭。

 

Jimmy爆金利來集團太子爺Ricky千杯不醉

 

  Jenny今日喺「香港工商界同胞慶祝中華人民共和國成立68週年籌備委員會成立大會」上面撞到身為中總副會長嘅佢,Jimmy見到我哋一班記者都走過來吹吹水。

 

  不過,當行家們問Jimmy對近日幾單法庭案件判決佢點睇嘅時候,Jimmy就答得好小心,思考緊嗰陣,咁啱畀路過嘅另一位中總副會長、金利來集團太子爺曾智明(Ricky)見到,笑佢話如果諗唔到點答就要請飲酒。

 

  Jimmy都冇佢咁好氣,笑住咁同Jenny講,佢不知幾想請Ricky飲酒,但明明成日都係Ricky撩人去飲酒先,但最後話唔得閒嗰個又係佢,所以佢都慣咗喇。佢大爆Ricky係千杯不醉,面對幾烈嘅酒都面無懼色,「識佢咁多年,真係未見過佢醉㗎!」Jimmy仲話呢兩日飯局多多,都唔敢食太多,但講到有得小酌幾杯佢依然開心。睇來Jimmy已經唔記得醫學界議員陳沛然(Pierre)之前勸過佢最好不煙不酒喇!Jenny明白嘅,點可能話戒就戒呢?不過為健康著想,小酌怡情好喇!

 

蔡校長「升呢」 同學唔敢答印象如何?

 

  立法會議員暑期冇時停,一班學生又何嘗唔係。今日青協搞咗個「香港青年大使」委任暨頒獎典禮,仲搵咗旅發局主席岳少林建岳出席主禮添!不過岳少全程都冇乜點開過金口,又唔使致辭,典禮一完就「嗖」一聲走咗。

 

  Jenny白等成個鐘之後,終於有位同學仔引起小妹嘅注意,皆因有位姓楊嘅同學仔原來係小西灣間福建中學嘅中六生噃!相信心水清嘅讀者都應該會記得,咪就係現任嘅教育局副局長蔡若蓮之前做校長嗰間囉!咁有緣,Jenny梗係要把握機會了解吓蔡副局仲係「蔡校長」嗰時係點啦!但係小妹妹都畀記者呢個問題問得措手不及,第一個反應就係:「講得嘅咩?係唔係唔講得㗎?」妹妹唔駛驚,Jenny喺大廳,蔡校長「升呢」係好事嚟㗎麻!

 

  楊同學就同Jenny講,同校長好少接觸,只有星期三朝早先會係學校門口見到佢喎!雖然有啲失言,但就巧妙咁避開記者問對前校長印象嘅問題,呢位同學仔孺子可教也!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#蔡若蓮 #青協 #吳永嘉 #曾智明 #小酌怡情
編輯推介
即時報價
全文搜索
Search
最近搜看
雙幣交易
聚焦兩會2024
More
Share