衣食住行，相信對於香港人嚟講，最頭痕就係個「住」字，事關土地問題存在已久，而香港政府就搞極都未掂。前特首CY為咗遏抑樓價推過幾次辣招，但就好似冇咩顯著成效，樓價仲不跌反升。「樓」已經成為香港人最大嘅心魔。

 

 

有咗「首置上車盤」呢個idea之後，邊度搵土地起佢係一大難題。

 

平嘢有代價 好過冇樓揸

 

　　 而今日林鄭出席完一個有關房屋嘅論壇，都忍唔住向Jenny同埋一班行家講，而家連「收入唔錯」嘅年輕家庭都未必可以負擔得起買樓，當日佢競選政網入面提出嘅「港人首置上車盤」就係為呢啲年輕人提供第一次置業嘅機會，仲話呢啲機會淨係留畀有「三粒星」嘅「香港永久居民」（香港永久居民、香港永久居民、香港永久居民，好重要！Jenny心裡面要講咗三次）；另外，如果你已經有或者買過居屋、物業，Oops！Sorry！咁你就冇份㗎啦！

 

　　至於呎價點定、搵咩地去起呢啲「上車盤」，林鄭都唔願咁快揭曉，只係話詳情會係《施政報告》到公布喎！平嘢唔一定冇好，不過要買平嘢就始終要有代價。林鄭都係咁話：「如果定價愈相宜，限制就梗係會愈多！」不過佢都講明，等遲啲佢哋嘅家庭狀況或收入改善咗，私樓供應又多咗嘅時候，相信佢哋就會有能力買返私樓。據Jenny一直以來收到的消息，「首置上車盤」應該係會用收入負擔水平去定價，而唔係居屋咁用市價折扣去計。」

 

「上車」定「郊野」？

 

　　香港人好簡單，無非想有瓦遮頭，先「安居」咪可以「樂業」囉！平台大花園、世界級會所，對好多人來講根本唔係重點！所以林鄭都話呢啲「上車盤」無論喺面積或者係設計、裝潢方面，都會樸實一啲。Jenny幾時都支持，樓係要實而不華嘅！

 

　　咁地從何來呢？林鄭就同Jenny講話「長策」（《長遠房屋策略》）都未夠地起公屋，所以政府都盡量唔會用嗰啲土地，費事影響公營房屋供應啦！因此就要搵新嘅土地來源喇！林鄭再一次打開口牌，話都不外乎係維港以外填海、郊野公園邊陲、新界棕地、市區重建，仲有塊私人發展商已有嘅地咁囉。

 

　　 嗱！「土地供應專責小組」今日就首次開會，林鄭都寄予厚望，但係有唔少民間團體就質疑，呢個小組唔少非官方成員都有表態撐開發郊野公園，連前天文台台長林超英都話，冇乜環保人士作平衡，擔心小組一早有既定立場要踩入郊野。到時要「上車」定「郊野」？小組入面個「大辯論」真係拆得掂？小妹真係要拭目以待！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇