收藏文章 

2017-09-25

尹兆堅歐遊考察組合屋 罕有唔鬧撐「起住先」

  雖然莘莘學子返咗學差唔多一個月喇,不過立法會就仲未放完暑假,去到仲有兩個星期先復會,復會第一擊就係《施政報告》,大家最關心相信都係房屋問題啦!民主黨立法會議員尹兆堅就同Jenny講,佢趁呢段時間走咗去歐洲考察,考察啲咩呢?就當然係房屋問題啦,仲要係同近排最Hit嘅「貨櫃屋」有關!

 

 

組合屋都唔一定係用貨櫃整嘅,睇相真係好OK噃!

組合屋不一定是貨櫃

 

  原來阿尹去咗睇人哋點搞組合屋,Jenny之前都有喺facebook見到呢啲組合屋,之不過係用貨櫃整,安唔安全㗎?阿尹就同Jenny講,佢哋都話消防條例嗰啲都一定要做返好先得,唔可以讓步;同埋原來組合屋都唔一定係用貨櫃整嘅!有啲組合屋仲會有得專門訂製外框,整出嚟仲可以好豪華添!Jenny睇返佢去考察拍嘅片,咦?!啲組合屋睇落又真係同普通嘅屋冇咩分別噃!只不過係Size就細咗啲咁囉。

 

  之但係,喺個貨櫃入面住,夏天咪好熱囉?阿尹就解釋,熱都唔使太擔心,皆因歐洲都有我哋呢個問題,只不過佢哋係凍我哋係熱,佢哋要裝暖氣而我哋要裝冷氣啫!所以問題唔大喎。

 

百一公頃地 業主未必願意起喺佢隔離

 

  不過阿尹就好強調一點,話呢啲組合屋係用嚟做過渡性房屋,係臨時性嘅,所以理應用臨時地(短租地)嚟起,而永久地就梗係用返嚟起公屋啦!但係佢都覺得呢啲臨時地嘅租約都要有返咁上下,大約5年左右,因為要預返興建時間同埋居住時間。阿尹話,如果呢啲臨時組合屋搞得成,佢哋就建議政府畀啲輪候咗公屋三年以上,或者係住喺惡劣環境嘅人士住住先,仲話如果佢哋已經等咗三年,再喺臨時屋度住多五年,政府仲未分配到公屋畀佢哋都好唔合理卦?所以就覺得起臨時屋都係一條「踏實嘅出路」去紓緩住屋問題。

 

  不過,叫得土地問題,就梗係政府冇地先會出現問題啦!咁又喺邊度搵地起呢啲咁嘅組合屋呢?阿尹就話查咗啲數據,政府現存嘅可供公眾短期租賃閒置土地有927塊有潛質去發展呢種臨時組合屋,佢估計埋計埋佔地有成110公頃,即係可以起到1萬4千個單位咁多!不過,有啲地其實喺啲豪宅同獨立屋附近,嗰到嘅業主願唔願意你起喺佢隔離又係另一回事喇!唉!呢個年頭,香港人想有個小天地真係唔容易呀!

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#土地問題 #過渡性房屋 #貨櫃屋 #房屋問題 #組合屋 #施政報告 #立法會 #本土 #特首
編輯推介
即時報價
全文搜索
Search
最近搜看
跨境理財通
恒大困局
More
Share