冇公眾假期嘅「地獄9月」差唔多拜拜！Jenny由七一開始就好期待10月嘅到來，事關國慶同中秋好近，請三日假就可以連放九日咁多！Jenny都Plan咗行程去Happy！不過，Jenny梗係唔會忘記大家啦！所以喺出發之前就幫大家八到今年煙花匯演個安排係點，幫大家做定功課，尤其係揸車嘅朋友就更加要留意喇！

國慶煙花模擬效果圖。

今年煙花有兩個「第一次」！？

　　今年煙花匯演分咗八幕，預計歷時約２３分鐘，共發放３１８８８枚煙花，認真好意頭！負責嘅製作公司話，今年適逢香港回歸二十周年及臨近中秋，希望以煙花為大眾帶來歡樂。第一幕叫做《啟航》，將會有２０次紅色嘅「中国HK」字樣嘅煙花出現，同埋會配上紫荊花圖案同埋紅色阿拉伯數字「２０」添！而第二幕《同舟之情》仲會有７２個「紅色心型笑臉」造型煙花，係第一次用為一個禮花彈就可以先後完成「笑臉」同「紅心」嘅變換！仲有第六幕個主題叫《愛在香港》，都係第一次有立體心形煙花效果出現，象徵心連心咁解喎！ 

封路年年差唔多　記得留心聽廣播

　　警方就預計，今年去睇煙花匯演嘅人數同上年差唔多，而警方同水警安排嘅人手都係同上年差唔多喎。阿Sir，差唔多即係幾多先？大家行家都追住呢個問題嚟問，但係港島總區警司（行動）張Sir張惠華就一於唔答，淨係話同上年差唔多呀、會有適當嘅人手去應付突發情況喎！ 

　　話就話數字同上年差唔多，但係上年維港兩岸都有成２８萬人咁多，阿Sir都要有封路嘅安排㗎！Jenny就八到今年煙花匯演當晚，尖東同尖沙咀市中心一帶嘅維港路段就會喺夜晚７點就開始實施第一階段封路，７點半開始天星碼頭個巴士總站都會暫停服務；而對面港島區呢，就由７點半開始封灣仔北，所以各位司機大佬要留意住電台廣播喇！

　　雖然相信各位阿Sir都會好盡責咁做好個交通安排，不過Jenny都係覺得大家為環保又好，為道路暢通又好，都係盡量搭公共交通工具啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

WoW WoW星期三：健康網購產品低至$99 (只限今天)► 立即行動