林鄭月娥終於喺今日公布咗佢任內嘅第一份《施政報告》，真係千呼萬喚始出來啊！Jenny同一眾行家今日就要喺立法會同政總之間來回穿梭，本來都預計今日都應該係要衝鋒陷陣冇得停㗎喇！點知都有啲小插曲，估唔到林鄭都有啲「蝦碌」嘢出現噃！

左邊係記者會時嘅穿著；右邊係去立法會時嘅穿著。

多咗網媒同學生媒體 特首唔記得咗加時？

　　今次係政府總部開放網媒採訪權後，首次進行《施政報告》記者會，所以預計記者數量多咗好多，大會都話將個記者會時間延長30分鐘至75分鐘，不過唔知係唔係林鄭未適應呢？最後未夠75分鐘就話記者會結束，有行家就大嗌：「未夠鐘喎」，林鄭聽到之後窒咗窒，隨即非常豪氣咁講：「哦！咁答埋先囉！」就調返轉頭答多兩個問題再走。不過事後特首辦就話，其實當時已經過咗3點半嘅原定結束時間㗎啦，不過特首費事拗咪答多兩條囉！究竟點解會出現呢個「分歧」呢？原因就係，林鄭遲咗5分鐘先入場，Jenny見佢換套靚衫噃，由今朝去立法會嗰陣嘅裸色鞋配啡色旗袍，換成黑色鞋配深藍色旗袍，同天藍色Backdrop襯晒色，唔通係因為咁所以遲咗？如果係Jenny都好理解，愛美係女人天性來㗎嘛！

中史即國民教育？林鄭轉身射個三分波

　　一早就有消息話今次份報告重點係房屋同扶貧，果然今日林鄭份講稿有大部分篇幅都係講住屋同派錢。就咁聽仲有少少似《財政預算案》添！Jenny都係拿拿聲拎埋份報告全文嚟睇吓先！一睇，竟然發現唔少團體一直好關注嘅中史科獨立成科，將會喺下個學年落實噃！平時政府講到認識國家咁重要，但係點解今日林鄭又唔親自講出嚟呢？再睇睇，「國民教育」呢4隻已經唔再講喇……唔通即係唔再存在？

　　Jenny心裡心裡呢個謎～相信只有林太可以解到，不過問答會咁多記者，小妹舉極手都冇人理，好彩有其他行家都有同樣問題，想問林鄭究竟中史科獨立成科之後會唔會變咗國教㗎？Jenny本身估林鄭會話政府會中立呀、叫大家唔使咁擔心呀之類嘅說話。點知林鄭話：「中史內容當然係交返畀專家去講喇，喺教育部分呢我就唔扮專家嘅。」Jenny真係估唔到「好打得」嘅林鄭會咁講喎！可謂「一個轉身射個三分波」！計Jenny話林鄭真係醒到爆啦，國教呢個燙手山芋點答都會出事，唔答就自然冇人唔滿意啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇