《施政報告》發表之後，Jenny都未停過，今日亦係喺政總同立法會之間穿梭咗成日。噚日見完林鄭，今日就有各個局長出咗嚟為《施政報告》解畫，就住自己所屬嘅範疇講返兩句，不過上一場嘅食衛局長陳肇始、民政局局長劉江華同埋勞福局長羅致光都係「一支公」咁出嚟迎戰，點知緊接嘅下一場創科局記者會一出就係４個人！創科局常秘卓永興、政府資訊科技總監楊德斌同創新科技署署長蔡淑嫻齊齊眾星拱月咁傍住局長楊偉雄，Jenny覺得應該係因為特首林鄭都講過好重視創科，怕局長一個講得唔夠清楚，所以咪一次過曬冷囉！

創新科技署署長蔡淑嫻（左一）、創科局常秘卓永興（左二）、政府資訊科技總監楊德斌（右一）同齊齊傍住局長楊偉雄。

楊局長客串GOGOVAN代言人

　　大家可能都記得，林鄭之前就一直係咁講「拆牆鬆綁」，今日創科局局長楊偉雄都係一直咁講住呢四隻字，不過有好多行家都問佢幾時鬆綁Uber先？局長就話唔好一直用一間公司做例子，但係佢就獨愛GOGOVAN，不斷提及GOGOVAN，話佢哋兩間都係大同小異，但係GOGOVAN就合法，Uber就唔合法，至少提咗五、六次以上啊！Jenny都睇得出局長你好欣賞呢間公司，但都唔使提咁多次嘅！唔講仲以為局長你係佢哋「代言人」添啊！

阿涂嬲豬唔食飯，阿廷聞言O晒嘴

　　立法會呢邊朝早開完《施政報告》答問大會，一堆議員當然有好多嘢想講啦！民主黨立法會議員林卓廷（阿廷）就出嚟講返林鄭話派交通補貼呢件民生大事，希望可以將上限增至600蚊…講完正經事，話說噚日林太就話約咗全體議員食飯，所以有人就問阿廷：知唔知民主黨會派邊個做代表去出席林鄭搞嘅議員午宴呢？阿廷就好爽口咁答：噚晚已經傾好咗喇，會派出阿涂涂謹申出席。

　　就係呢個時候！行家就話：阿涂話因為林鄭今日係答問大會上面嘅表現太差，令到佢嬲嬲豬，所以佢就唔參加呢個午宴喇！阿廷一聽，即刻勁大聲咁「吓」咗出嚟，O晒咀，一班行家即刻爆笑，搞到阿廷好無奈咁話：「哎呀！佢哋應該早啲話俾我聽呀嘛！」Jenny而家諗返起佢個O咀樣都忍唔住笑！睇嚟你哋真係要做返好啲溝通工作喇！成日出現呢啲「蝦碌」唔好睇㗎嘛！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情