立法會今日繼續辯論政府提交的「一地兩檢」無約束力議案，Jenny同行家當然要昅實，睇吓個議案幾時表決啦！原本尚算風平浪靜嘅一日，因為朱凱廸（阿廸）嘅《議事規則》88(1)條動議，又掀起一番巨浪喇……

「高鐵夢」VS「港鐵夢」

　　其實今朝嘅討論仲好地地，大家喺到各自表述自己點解支持同反對，就好似平日嘅會一樣。比較特別嘅係，工聯會陸頌雄發言，開初都係講返自己點解支持、一地兩檢點好、高鐵點好……但係！呢啲都唔係重點！事關Jenny聽聽吓，聽到佢高呼I have a Dream！呢個Dream就係「一個高鐵夢」，咩解究呢？原來佢話自己細個時返鄉下坐車環境好差，當佢知道原來日本有新幹線、歐洲有歐洲之星，「真係好羨慕」。佢仲拉埋國父孫中山落水，話呢個「高鐵夢」唔只係佢一個人嘅夢想，因為孫中山先生喺100年前已經喺建國方略提出，目標要建設十萬英里鐵路網云云……陸議員你發咩夢，係你嘅自由，Jenny唔會阻止你，好似小妹都有個「港鐵夢」，比「高鐵夢」簡單一啲……只係希望有一日佢唔好成日壞車、有一日佢唔好再加價……

阿廸以88（1）條突襲，想趕記者出去？

　　講返個會先，去到下晝，就當發言人數接近隊尾嗰時，阿廸又出招突襲喇！今次佢就用從來無議員用過嘅《議事規則》88（1）條，動議要求新聞界及公眾人士離場，呢個情況之下，每個議員就可以有15分鐘發言時間，傾吓係咪要趕班記者出去。What？Jenny心諗咁都可以燒埋我哋嗰疊？記協都即刻出嚟幫我哋講兩句，話覺得好遺憾，其實議員同政府之間嘅爭拗唔應該影響到傳媒採訪權，相信傳媒出身嘅朱凱廸都會了解嘅。係囉！阿廸又點解要用呢招？

梁君彥中途「剪布」，泛民吵到火紅火綠

　　阿廸自己就解畫，話提出議案係因為建制派提出修改《議事規則》，削弱市民和議會嘅監督權力，希望自己係立法會歷史上第一個，亦都係最後一個提出呢項動議嘅議員。佢仲話好清楚，知道自己有可能被人誤會限制言論自由，但民主派需要喺關鍵時刻頂住壓力，捍衛立法會尊嚴。同為新聞界出身，Jenny都明阿廸個原意嘅，不過今次辯論到一半，主席梁君彥忍唔住要「剪布」，限制再傾多半個鐘就要表決，一眾泛民議員當然就即刻拍晒枱啦！質疑主席濫權，你一言我一語，吵到火紅火綠，仲話有可能開另一個「剪布」方式的先例，今次真係唔知點收科喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情