本來今日就係Happy Friday，而立法會就開緊內會要傾修改議事規則，連財務委員會主席波哥陳健波都要讓路畀內會開埋先，Jenny就一早估到，今個Friday應該都唔會好Happy喇！

 

 

開內會之前，一班泛民議員已經出嚟「宣戰」，事先張揚會盡量令到修改議事規則嘅議程唔能夠喺今日嘅內委會提出。

 

泛民「宣戰」頻提規程問題 琼子限講30秒

 

　　果然不出小妹所料，未開內會之前，一班泛民議員已經出嚟「宣戰」，事先張揚會盡量令到修改議事規則嘅議程唔能夠喺今日嘅內委會提出嚟。跟住開會當然火花四濺，嘭、嘭聲咁款啦？泛民議員個個都提規程問題，Jenny都聽到亂晒籠。

 

　　不過，由於有關修改議事規則嘅議程係喺第7項，所以內會都係要先講晒前邊嗰6項先至可以進入戲肉嘅？內會主席李慧琼(Starry)唔知係咪要挽回返尋日嘅失誤，一於慳時間去到盡，限制每名議員只可以發言30秒。嘩！30秒？急口令咩？Jenny讀兩次麥當勞漢堡包急口令已經冇咗，何況係平時能言善辯嘅議員呢？

 

象哥一句成功壓場 Paul施展「功守道」

 

　　民主派嘅議員當然唔服啦！大家就愈講愈勞氣，輪到進出口界議員黃定光（象哥）講嘢時，因為實在太嘈喇！沉睡的象哥要甦醒了！嬲到爆咗一句「收嗲啦」！隻隻字都擲地有聲，一啲都唔似平時象哥係議會入邊嘅風格噃！呢招一出，又真係令到議會頃刻靜返少少，唔知大家係唔係都畀象哥震攝到呢？

 

　　終於到關於修改議事規則嘅戲肉喇！Starry就叫議事規則委員會主席謝偉俊（阿Paul）讀一讀份文件，因為咁先至可以開始進一步討論，期間人民力量嘅陳志全（慢必）衝前，想搶阿Paul嘅咪同埋文件抗議，阿Paul唔知係咪睇咗馬雲套「功守道」呢？佢猶如太極宗師上身，右手一撥、手肘一推一撞擋開慢必。慢必本想再伸手，保安叔叔此時就一個箭步上前阻止，寫出來好有武俠小說Feel，實情現場情況混亂非常。期間仲有保安跌倒整親手，要Call白車添！

 

議會回歸平靜 發夢冇咁早

 

 　而喺呢個咁混亂嘅期間，阿Paul就好似置身於另一個世界咁，全程5分鐘完全冇停過讀稿，連個咪頭跌咗都無理，令到Jenny懷疑阿Paul係咪真係去咗修練啲咩功夫？

 

　　好彩嘅係，最後保安叔叔都可以自行登上白車。而衝咗出位嘅慢必最後竟然冇被人趕走、阿Paul亦都可以無間斷咁讀晒份稿，議會又回歸平靜，好似冇事發生過咁。Jenny經歷完呢幾個鐘嘅事之後，有一吓覺得自己頭先係咪發咗場夢？再低頭望望手上積壓嘅稿件……唉！我都希望係發夢啊！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇