收藏文章 

2017-11-30

青年委員自薦計劃原來似玩小學派位

  政府為咗吸納年輕人意見,之前就將「青年事務委員會」升呢做「青年發展委員會」,再推行「青年委員自薦試行計劃」。而政務司司長兼「青年發展委員會」主席張建宗早前仲同「青年事務委員會」主席劉鳴煒(Package Lau)拍咗條「心靈unlock」片嚟宣傳呢個計劃添!效果係點Jenny唔識評論,總之恕小妹唔識欣賞啦!

 

 

平台話個拳套代表「權力」,希望政府下放更多權力畀青年,日後最好就成立一個青年議會。

 

自薦計劃今日收表逾500 人人爭踩踏腳石

 

  貶下眼自薦計劃招募今日截止報名。前兩日張司長就同由一班真.青年人組成「民間青年政策倡議平台」見面,聽呢班年輕人對呢個自薦計劃同埋青年發展委員會有咩意見。Jenny就一於問下成員前兩日同司長傾咗啲乜先!

 

  平台成員何詩慧(Naomi)Jenny講,政府話收到500幾份申請,但係位就得11個,其實都反映到根本唔夠位。Naomi仲話,佢哋睇過份申請表,原來好似玩小學派位咁!因為一共有5個委員會可以申請,但係申請表得一份,申請者要就住自己想入邊個委員會,列優先次序,所以申請者係有機會被派去次選㗎!不過計Jenny話,去邊個委員會又有咩所謂,對好多人來講都只係加入政圈嘅一個踏腳石嚟啫!

 

青年委員得3個 無緣見Package Lau喇!

 

  NaomiJenny呻,今日已經係截止報名嘅日子,但係政府仲未有詳細嘅委員會資料可以公布,連委員會嘅組成同埋職能都未知,之前大家仲以為有咗呢個「青年發展委員會」,政府喺青年事務上會有所突破啦,所以抱着期望去見司長,點知失望而回,其他成員都認為今屆委員會唔係咁值得參與,最後決定唔報名參加呢個自薦計劃。

 

 

  叫得「青年發展委員會」,Naomi都話,希望日後政府可以檢討青年委員嘅比例,因為而家青年委員竟然只係得3個人,代表性又點會夠呢?其實Jenny都覺得,而家即使喺議會入面,非建制派都分咗好多種,又溫和民主派、又進步民主派、仲有自決派、本土派之類,就算政府真係「來者不拒」到每個派系都請一名青年入去做委員,仲未計建制派都已經唔夠位啦!照咁睇,好似小妹呢啲平凡人,就算交咗表,睇嚟都咩冇機會入去同 Package Lau同檯開會呢!嗚嗚!

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

更多言歸政傳文章
你可能感興趣
#青年發展委員會 #Package Lau #青年議會 #踏腳石 #青年委員自薦試行計劃 #心靈unlock #青年事務 #小學派位
編輯推介
即時報價
全文搜索
Search
最近搜看
大國博弈
跨境理財通
More
Share