特首林鄭月娥喺競選時就話領展(00823)係施政嘅「三座大山」之一，而一直有關注呢個議題嘅新民黨主席葉劉淑儀（葉劉）都一樣成日抨擊領展，今年似乎仲加多幾錢「肉緊」，頻頻出文批評，點知今日(6日)佢就聲稱幾個星期前曾經被領展「恐嚇」，叫佢「收手」！

 

 

葉劉話暫時就唔會公開段錄音，亦都唔會報警。（資料圖片）

 

想食個飯就擺平葉劉？冇咁易！

 

　　是咁的，今日立法會開大會，第一項議員質詢就係講領展問題。雖然呢個質詢唔係建制派提嘅，但係葉劉咁關注呢個議題，所以完咗質詢循例都要講返兩句。點知佢大爆幾個星期前，領展透過專欄作家李兆富，同新民黨嘅政策總裁袁彌昌講「叫葉劉好收手喇！再唔收手就會『郁』佢啲區議員」。之後葉劉向領展嗰邊表示不滿：「有冇搞錯？恐嚇我？」，跟住領展就不斷派人向佢道歉，又話請佢食飯；但係葉劉就梗係唔制啦，仲話「因為請我食靚餐、飲靚酒就可以擺平我咩？簡單係荒謬！」仲話手上有錄音嘅證據添！不過，葉劉話暫時就唔會公開，亦都唔會報警，因為警察仲有好多嘢要做喎。

 

阿廷話Me too 

 

　　身為前保安局局長嘅葉劉都被恐嚇，Jenny真係好難唔被嚇一跳。但係原來除咗葉劉，連民主黨嘅林卓廷（阿廷）都身受其害，仲話要出嚟「聲援」葉劉添！

 

　　阿廷話，原來喺今年7月嘅時候，民主黨就沙田某個屋邨商場改建嘅事，同領展約咗好多次都見唔到面，所以佢同同事就去到領展嘅辦公室抗議，貼吓標語嗌吓口號咁，點知事後領展公關竟然話，公司之前同民主黨有協議，唔會同參與抗議嘅議員會面。阿廷梗係返去問返民主黨啲黨友啦，點個個個都話冇做過咁嘅協定，阿廷唔嬲就假啦！大鬧嗰個公關公然「講大話」、操守惡劣，依家講返起仲係好燥，所以佢對葉劉嘅經歷唔會感到驚訝，同埋致以深切慰問！

 

領展:對指控感震驚

 

　　阿廷仲同Jenny講，領展都有話請佢食飯慢慢傾㗎，不過都被佢拒絕咗。阿廷呼籲葉劉提供多啲詳情，同埋挺身而出去舉報有關人士，因為都估呢樣嘢領展唔會係第一次㗎啦，仲話有機會希望同葉劉整返個聯署聲明添！嘩！一個領展事件竟然可能促使到建制同泛民世紀合作，Jenny真係要講返句「欽敬、欽敬」！

 

　　Jenny梗係即刻去問問領展有咩回應啦！佢地就同Jenny講一直有同新民黨保持溝通，包括立法會議員、各區區議員、研究部職員等，對於指控感到好震驚，指公司絕對不會透過任何人士，向新民黨表達相關言論。領展仲話，「鑑於葉劉淑儀就領展事務的評論，反映她對公司的情況了解並不全面」，希望透過不同途徑加強有關溝通工作，未來會繼續加強雙方溝通，藉以強化關係，釐清誤會。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇