上星期告別咗2017，唔知大家係點樣迎接2018嘅呢？Jenny就知道中大都係2018年第一日迎嚟咗個新校長，佢就係港產嘅生物醫學學者段崇智。不過因為噚日元旦係公眾假期，所以今日先係新校長第一個返工日！所以Jenny今日一早就山長水遠咁入到中大，率先同大家睇吓新校長第一日返工有咩感受先！

離遠就見到佢條Share醒紅呔。

　　PR姐姐就同Jenny講，校長係9點返工嘅。不過作為打工仔嘅你同我都知，第一日返工梗係最好有早冇遲喇！所以今日段校長都早咗15分鐘返到Office，Jenny離遠就見到行緊過嚟嘅段校長，佢條紅呔都幾搶眼噃！不過件裇衫就同上次同學生見面嘅時候一樣係藍色，而心口袋就多咗枝筆。唔知呢件裇衫係同上次同一件，定係段校長諗住以後都用藍色裇衫，打造成佢嘅「招牌校長Look」呢？

段校長話第一日返工「好開心、好興奮」！

心口袋枝筆，返工唔會慌失失

　　段校長今日春風滿面、笑容可掬咁，見到傳媒仲主動打招呼，用好純正嘅廣東話同大家講「新年快樂」添！睇嚟佢之前雖然長居美國，但係都無損對廣東話嘅熟悉程度噃！

　　段校長仲同大家分享第一日上任嘅心情，好風騷咁話「好開心、好興奮」，更自爆仲未去自己個Office睇過。不過有行家追問佢今日有咩行程，佢就話有好多嘢要做，聽日再同大家傾偈，跟手就轉個身入咗Office嚕。段校長由踏入行政大樓門口至到入校長室，呢個過程歷時都唔知有冇兩分鐘！不過Jenny同一眾行家就至少等咗20個兩分鐘喇！既然段校長走得咁快，冇得「回水」，Jenny梗係點都要喺校園食返個靚早餐補數先！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情