收藏文章 

2018-01-22

基哥棄做Plan B攞尾彩 海文淆底泛民仲可搵咩人出來?

  民主動力上個星期就終於終於終於(很重要所以要說三次)完成咗個初選,慢咗對家幾拍先至開始做宣傳,Jenny以為成件事終於都叫做塵埃落定。點知九龍西嗰邊,因為姚松炎贏到開巷,但亦都係最有可能被DQ參選資格嘅人,作為第二名嘅「Plan B」嘅民協馮檢基(基哥)就被人質疑,如果姚松炎被DQ,佢代唔代表到選姚嘅市民,畢竟Jenny都記得喺上次2016年立法會選舉嗰陣,已經聽到唔少聲音叫基哥早啲退休,畀啲機會新人喇!

 

 

基哥今日雖然宣布唔做「Plan B」,但現場睇佢心情好好咁噃!

 

薑係老嘅辣 光環到手唔駛出醜

 

  呢件事就講咗成個禮拜,基哥今日終於頂唔順要開記招講返兩句,一嚟就話「我唔做Plan B」!佢話係因為覺得結果出咗之後,大家唔係集中幫Plan A拉票,而係對佢呢個Plan B有好大爭拗,啲網民又因為唔鐘意佢個人,連佢屋企人都鬧埋,覺得幾唔開心,要同屋企人道歉添!所以都係覺得「退一步海闊天空」,解決今次爭拗喎!

 

  就咁睇基哥好似好慘慘豬,不過Jenny諗諗吓,今次一役最大得益者其實反而係基哥,退一步光環到手,又唔駛出醜。「薑係老嘅辣」咪就係咁解!

 

初選機制同遞補機制有咩分別?

 

  唔知大家仲記唔記得,6年前立法會有個遞補機制爭議,建議立法會再有民選議員出缺,唔使再做補選,而係以之前最高票數落選嘅參選人補上。Jenny舉個例子,就係有A、B、C3個候選人,由於A同C嘅立場相近,支持A同C市民投票時集中投咗畀A,結果係A有六成票,B有三成票,C得一成票。如果A走咗,有遞補機制嘅話就會由B補上,但有可能揀咗A嘅市民想揀返C,就會導致C雖然坐擁七成支持,但都係拎唔到個議席。當時方案引起極大爭議,最終通過嘅機制就冇咗「遞補」,但就限制自願辭職嘅議員6個月內唔可以再參加補選。

 

  不過,世事往往就係咁諷刺,估唔到6年之後,民主派今次個初選嘅「Plan A、B、C」機制,同佢哋之前反對嘅遞補機制咁相似噃!

 

  今次民主派嘅九龍西初選結果,Plan A姚松炎喺實體投票同組織投票都有過七成支持度,馮檢基(Plan B)同袁海文(Plan C)各自都拎唔到兩成支持,Jenny之前仲聽到唔少九龍西選民話基哥「永續選舉」,唔畀啲機會新人。

 

基哥退海文淆

 

  今日佢出嚟話放棄Plan B資格,反而就得返唔少掌聲。原本剷到佢上天嘅網民,態度一個屈尾十,轉為大讚「知進退」、有「大將之風」,仲有唔少人戥佢可憐,鬧返姚松炎、自決派轉頭噃!唔講Jenny仲以為基哥,今日變咗仲基哥添!

 

  咁樣攪一攪,基哥呢次就可以喺掌聲中「退役」,「Plan C」袁海文就淆晒底咁款,之前公開叫基哥唔好退,今日就猛話出唔出選唔係自己決定到……Jenny完全明白點解佢咁淆喎!皆因佢知名度低已經係不爭事實,睇佢初選個得票率就知,加上民主黨呢個背景,其實有唔少後生仔唔係太Buy,佢真係出來選可唔可以令人「含淚」投票,真係好難講喇!

 

  據知,泛民中人都知袁海文無力撐起大局,亦說服唔到姚松炎支持者去投一個比基哥支持度更低嘅人,所以已經開始放風話Plan B唔玩,唔等於Plan C頂上,皆因呢個初選「遞補」機制只適用於個Plan畀人DQ嘅情況云云……

 

  而家距離提名期完仲有一個禮拜,邊度搵個Plan X出來呢?如果是但唔合心水就整個新Plan,咁搞壇初選出來又有咩謂呢?Jenny只好買定花生等睇戲喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet TV頻道現已登場,多元化財經及消閒影片輪流送上! ► 即睇

更多言歸政傳文章
你可能感興趣
#提名期 #立會補選 #Plan B #DQ #馮檢基 #姚松炎 #民主動力 #初選 #袁海文 #遞補 #永續選舉 #立法會 #選舉 #本土
編輯推介
即時報價
全文搜索
Search
最近搜看
東京奧運
疫苗福利
More
Share