立法會補選嘅提名期踏入最後一個星期，噚日民協馮檢基（基哥）放棄做Plan B，九龍西而家立立亂，傳統泛民同進步民主派似乎因為咁又再次分裂，Jenny都冇眼睇喇！Jenny噚日講完九西，今日就將鏡頭轉一轉去新東啦！

 

哪吒不怕海龍王！方國珊又再戰新東喇！如果有埋佢契爺修哥來撐場，會更有睇頭！

 

哪吒新東第五戰

 

　　講起新東，都好難唔提「哪吒」方國珊呢個名，事關佢喺新東嘅戰績係「三戰三敗」，屢敗屢戰又屢戰屢敗之後，上年宣布自己已經輸晒啲「姑婆本」，唔會再參選。點知今日佢又再次走出嚟話已經報咗名參加今次嘅新界東補選啦！仲話已經收到8000幾個市民嘅提名添！果然哪吒不怕海龍王！

 

　　雖然方國珊（Christine／哪吒）喺將軍澳嘅名氣就比較高，但係你知啦，選得新東，點可以淨係顧將軍澳啲選民呢？Christine今日就喺大圍站出邊舉行造勢大會，仲請咗啲街坊嚟支持佢添！只不過當主持人問到啲街坊：「你哋來自邊度㗎？」個個都係話「將軍澳！」Jenny同身邊嘅行家都一致「黑人問號」，咁點解唔返去大本營造勢呢？

 

「本」是同根生 商界助Fill Up

 

　　原來Christine同其他報咗名參選嘅候選人唔同，人哋係報名之前搞造勢大會，佢係報完名先搞，Jenny估佢都係單純覺得呢度離報名地點近近地，個位又夠大咁解啫！

 

　　不過上次講到連「姑婆本」都用盡咁慘，點解今次「唔嫁又嫁」？唔通出動埋「棺材本」？Christine就幾唔好意思咁同Jenny講，上次話「最後一次」係「輕率咗」，又話收到好多中小企、商界嘅街坊支持，「出人、出心、出力」，佢哋都唔嫌棄自己，自己就更加唔會放棄啦！佢仲話，香港人有抱打不平、鋤強扶弱嘅心態，睇嚟係暗示緊自己可以吸到唔少同情票。照咁睇，Christine似乎有排都唔會「最後一次」喇！

 

大爆CY曾招入閣 為做議員拒做官

 

　　近排就有傳媒發現Christine未報名參選之前，曾經報名應徵政府改組後嘅中策組。係唔係因為面試唔成功所以參選先？佢否認之餘仲大爆上屆政府有邀請過佢加入問責團隊，但係當時佢帶頭反對緊擴建堆填區，最後先冇加入！仲話任何有機會改善民生嘅方式都會參與，但係都係以入立法會為先。

 

　　今次Christine嘅口號係「全力以赴，重民生」佢話係契爺胡楓（修哥）啟發佢嘅！事關修哥有日同佢講：「而家個個議員都係講政治，不如試吓唔講政治，講民生吖？」小妹不禁佩服修哥真識玩，做立法會議員只講民生唔講政治，咪即係「升級版」嘅區議員囉！係嘅，Play Safe幾時都冇錯，但就略嫌悶咗啲囉！做政客最忌冇Noise啊！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情