收藏文章 

2018-01-24

民主動力推袁海文頂上 民主黨好似唔太想

  自從今個星期一(22日)馮檢基(基哥)話唔想做民主派Plan B,仲暗示被人勸退,搞到而家傳統泛民同自決派似乎又再次分裂,互相指罵。Jenny望住個日曆,離補選剩返1個月左右,但係睇住傳統泛民同自決派漸行漸遠,睇嚟民主派係咪能夠攞返九龍西呢一個議席真係同個天氣一樣-愈來愈凍過水。

 

 

趙家賢話到咗呢個moment,民主動力已經冇角色喇!

 

 

若失議席變罪人 難怪袁海文會騰

 

  一時之間大家將焦點落在負責協調初選嘅民主動力身上,睇吓佢點拆!佢哋今日都快快脆脆開返個會傾吓點算,事關姚松炎喺九龍西贏到開巷,得票大幅拋離兩個對手。民主動力召集人趙家賢就喺開完會之後就同Jenny講返,話會跟返機制,而家基哥退出,如果姚松炎被人DQ ,就應該由袁海文補上啦!

 

  之但係而家袁海文就淆晒底啵!叫基哥唔好退之餘,仲話自己參唔參選唔係自己決定,睇嚟佢都幾擔心如果姚松炎被DQ,自己出嚟選會好易輸,到時冇咗個議席,仲要無啦啦變埋罪人!畀著係小妹,我都褪呀!

 

民主動力「卸膊操」民主黨想Say No?

 

  據Jenny所知,民主黨聽晚就會舉行中委會討論係唔係由袁海文做後備。不過Jenny就覺得,點解要討論多次呢?既然民主黨成日都話要跟機制、跟機制,而家到袁海文上嘅時候又要猶豫,又想欽點?真係「大家都不遵守,不用分得那麼細」!第時佢哋鬧政府搬龍門時,會唔會有少少心虛呢?

 

  不過,初選就得3個人,如果袁海文最後唔做後備,民主派又會喺邊度搵個Plan X出嚟呢?趙家賢就嚟個「卸膊操」話初選機制冇列明有關內容,民主動力喺呢個位就冇角色喇。咁咪即係由得佢哋「互片」?Jenny心諗咁到時就好睇囉!趙家賢同Jenny你眼望我眼,唔肯再講落去,淨係強調「冇角色」呢三隻字。

 

當日好傻好天真 今日搵著自己笨

 

  趙家賢仲同Jenny講,因為姚松炎喺9月前都話無意參加今次嘅補選,所以喺備忘錄草擬完成之前,姚松炎同佢嘅團隊都冇參與持份者會議,而嗰陣喺九龍西被DQ議席嘅劉小麗,同埋青年新政游蕙禎都話唔會親自出選,所以喺草擬成份備忘錄嘅時候,都冇諗到有被DQ人士再參選嘅情況,大家都以為被DQ嘅風險係來自簽唔簽確認書咁大把咋!Jenny真係唔知話佢哋天真定係點喇......唉

 

  只不過開講有話,計劃係趕不上變化,今次出現咗冇估計過嘅情況,民主派又分裂得咁勁,睇嚟大家有排都面左左冇偈傾啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#九龍西 #立法會 #選舉 #立會補選 #卸膊操 #民主黨 #袁海文 #姚松炎 #Plan B #凍過水 #泛民 #自決派
編輯推介
即時報價
全文搜索
Search
最近搜看
恒大困局
透視大灣區
More
Share