新春團拜活動一個接一個，Jenny今日都去咗幾個，其中一個就係港大嘅團拜喇！場內最風騷嗰個，Jenny覺得要數剛獲Confirm續約嘅港大醫學院長梁卓偉（Gabriel）喇！ 

 

特別嘉賓：港大圖書館治療犬Jasper

 

　　今日港大舉行傳媒新春團拜，焦點之一當然要打聽下新任校長張翔幾時正式履新啦！不過，署理校長譚廣亨就繼續耍太極，但就應承小妹，一有消息就話畀大家知，叫大家「拭目以待」，「翹首以待」、「引頸以待」－－據Jenny所知，張翔幾時上任，最早知嗰個會係HR之後就係校委會主席，連署理校長都係被通知㗎咋！而家計埋交接等等，小妹估應該未來三個月內就會履新喇！

 

Gabriel派利是講心唔講金

 

　　之不過，譚校長就Confirm咗Gabriel獲得續約，將會做多五年醫學院院長。唔怪得Jenny見Gabriel今日鬼咁風騷啦！過咗初十個個都已經唔派利是，全場唯獨佢好似財神爺咁向行家大派利是！封利是封上面仲大大字「瑞犬迎春」－－Jenny同行家一望，即時會心一笑－－話想起某報的頭版標題，Gabriel諗咗陣終於Get到，即刻笑住叫大家唔好就住呢個祝福語想太多。

 

　　利是入面現金就冇喇，但就有一個導盲犬牌仔，同埋一句祝福語。唔知Gabriel係咪怕傳媒朋友們失望，除咗祝大家身體健康，仲要祝各位傳媒行家加多多人工，話每次佢見到傳媒機構老闆都會叫對方加人工畀記者，因為覺得記者朋友們揸筆搵食都唔容易，應該有高些人工。聽到呢度Jenny真係好感動！抵Gabriel你成為傳媒寵兒嘅！

 

利是入面現金就冇喇，但就有一個導盲犬牌仔，都幾Q呀！

 

泛民出6個都算比面喇 

 

　　另一邊廂，立法會主席梁君彥今日就設新春午宴，宴請咗特首林鄭，以及行會成員、政府官員同埋一眾立法會議員。非建制如果包埋醫學界陳沛然嘅話，都有6個出席，比起CY當年都算「畀面」喇！

 

 

林太話自己個新年願望係「身體健康」喎！

 

　　梁君彥致辭時就大讚林太上任以嚟，行政立法關係有所改善，因為林太唔單只跟議員Whatsapp，亦都會定期岀席立法會答問大會。梁君彥又話，今年狗年，狗呢就有8大美德：「忠、義、勇、猛、勤、善、美、勞」，就祝願各位議員喺唔同崗位發揮呢「八德」，服務社群喎！至於林太自己又有咩願望呢？佢就希望「身體健康」喇！Jenny仲以為佢又係答「行政立法關係得到改善」添！唔通林太覺得行政立法關係已經好返晒？定係佢深明喺流感高峰季節議員一旦中招就咩都做唔到，間接影響政府議案通過？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情