之前因為涉貪而被判入獄嘅前政務司司長許仕仁，同埋有份提供利益嘅新地前聯席主席郭炳江，上年終極上訴被終院駁回之後，今日政府就刊憲撤除佢哋兩個嘅勳銜，同埋撤銷作為太平紳士嘅委任噃！新正頭就冇咗個「荷蘭水蓋」，唔知喺獄中嘅佢哋係咪更感悲從中來呢？

前政務司司長許仕仁現今己成階下囚。（資料圖片）

自由冇晒 水蓋拜拜

　　其實曾經嘅社會賢達因為犯罪而被「搣柴」唔係咩新鮮事，早喺2012年仲係CY做特首嘅時候，就有三人試過被「搣柴」，就係前會德豐大班洪承禧、華人廟宇委員會（廟宇會）前成員胡詠紀，同埋前九龍城區議員蔣世昌，佢哋三個人都係因為衰行賄而被判監，成為香港回歸以嚟第一批被撤除獲頒勳章嘅人。

入冊被「搣柴」早有先例

　　洪承禧係因為收受45萬蚊賄款，以協助他人做馬會嘅全費會員，被判囚兩年；胡詠紀就喺長洲北帝廟翻新工程入面，聯同建築商奪得標書，將木材供應合約判給兩人於內地暗中開設嘅木材廠，並賄賂負責工程嘅民政事務局官員95萬，被判入獄兩年半；而蔣世昌就涉嫌喺09年區議會補選時賄選，用咗成200萬向選區居民提供免費晚宴、免費流感針同埋平價旅遊等等，被判入獄12個月，後來加刑至27個月。

　　繼幾位「前輩」之後，許仕仁同郭炳江偏仲要正值元宵佳節先嚟被人「搣柴」，Jenny只能嘆句「命裡有時終須有……」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

WoW WoW星期三：健康網購產品低至$99 (只限今天)► 立即行動