今個星期日就係立法會嘅補選日喇！各個候選人都喺呢幾日做最後衝刺，建制早就未開選先打「告急牌」，聽日仲有聯合「告急」大會，Jenny估係因為建制派啲大佬們上晒京開會，11號未必趕得切返港幫手催票，梗係要講定告急吸定票先喇！

 

 

姚教授玩「深宵RIDE」，好多市民當時都訓咗，宣傳有新意仲唔知有冇效呢？（姚松炎fb圖片）

 

UP片放相是常識吧

 

　　而今日星期五就係補選嘅最後一個平日，港島區民主派候選人區諾軒（區軒）今朝就拍住公民黨前黨魁兼主席余若薇、陳淑莊等齊齊落區呼籲大家投票。而有唔少候選人亦都選擇喺Facebook上載各方好友嘅支持片／相做宣傳。例如新界東嘅范國威（咖哩飯）就分享咗同社福界立法會議員邵家臻嘅合照啦、公民黨陳淑莊（Tanya）嘅打氣片等等。至於一直有好多新諗頭嘅九龍西姚松炎（姚教授）都有落區，不過佢就同大家玩「深宵RIDE」，噚晚一完咗論壇，就同埋團隊齊齊踩單車遊九西做宣傳噃！

 

高醫生有「舜」心

 

　　建制派嗰邊都唔輸蝕，陳家珮（Judy）今日就好似晒冷咁，搵咗行會成員李國章、工聯會吳秋北同埋自由黨嘅邵家輝拍片支持自己；而九龍西嘅鄭泳舜就唔似得Judy咁逐個PO啦，一片hashtag晒「#田北辰 #高永文 #鄺美雲 #廖長江 #鍾逸傑」咁多位。你睇，佢「同鄉」高永文（高醫生）個心口仲有個「舜」字添！

 

 

大大個「「舜」字掛喺心口，可想而知高醫生幾錫呢位世侄。（影片截圖）

 

　　不過Jenny就覺得梗係趁大家今日仲要返工返學嘅時候出嚟蒲個頭，好過淨係喺Facebook到「圍爐取暖」啦！咁先接觸到更多唔熟悉今次補選嘅市民呀嘛！

 

　　但係Jenny數嚟數去，數到三個民主派同埋兩個建制派嘅直選候選人都有啲嘢睇吓，不過建制派喺新界東仲有一個號稱「雙牌頭」嘅鄧家彪（阿Bill）去選㗎噃！不過小妹只見佢Facebook今日只得「重溫5000人造勢盛況」嘅回顧片睇吓，Hea咗啲噃！哎吔！阿Bill唔好咁啦！

 

　　新界東候選人還有黃成智、方國珊、陳玉娥和趙佩玉；九龍西候選人還有蔡東洲；港島區候選人還有伍廸希和任亮憲。

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇