噚晚係民主黨搞黨慶，現場可以話係呢幾年嚟最星光熠熠，事關今年特首已換人，林鄭一上場就講到明要改善行政立法關係，所以佢就帶頭同三司、眾多局長等賞面出席。連民主黨主席胡志偉都話，林鄭唔似得以前梁振英（CY）咁，要啲官員杯葛泛民政黨黨慶咁與民為敵喎！

 

 

林鄭喺Instagram到Post咗食飯啲相，仲要Hashtag埋「#大和解」!

 

#大和解？你解 我唔解！

 

　　不過志偉點都要強調返，其實而家都只不過係回復返正常做法，係應有之義，冇咩特別。但係林鄭就似乎唔係咁諗喇！話晒佢噚日一落機就過嚟，兼留咗成個鐘先走，仲耐過其他官員呀！去到表演環節，資深黨員李華明唱《笑看風雲》嗰時，林鄭仲即場捐咗三萬蚊添！係第一次有特首喺黨慶捐錢畀民主黨！唔知係唔係林鄭都覺得餐飯氣氛咁好，自己又畀足面佢哋，所以就喺Instagram到Post咗食飯啲相，仲要Hashtag埋「#大和解」。

 

　　林鄭呢個Post同捐款就一石激起千重浪喇！雖然係第一次有特首捐錢畀泛民，但三萬蚊呢個數，無論對特首定民主黨嚟講都只係「濕濕碎」，所以呢條新聞一出，已經有網民嘲笑民主黨「三萬蚊可以買起你」！小妹就覺得林鄭真識玩，用少少錢就換到「釋出善意」嘅形象，兼串民主黨嘅好機會，果然呢幾十年做官嘅經驗確係堅過石堅，試問你點同佢玩！

 

 

建制派「葡萄」 容海恩唱歌會值幾多？

 

　　而志偉今日都急急否認已經同政府「大和解」，澄清目前政府同社會嘅「大和解」仍然好遠，民主黨亦都會堅持對政府批判嘅原則喎！而林卓廷（阿廷）中午亦都喺社交媒體出Post，話「和解要雙方同意，絕不是單方面宣布」，不過Jenny都覺得挽回唔到幾多分數㗎喇！Bye～

 

　　至於喺行會睇實「妹妹」嘅葉劉亦都不滿林鄭嘅做法，話咁樣即係「公開捐錢去買Goodwill、買票，買人（民主黨）通過你啲野或者鬧少幾句」，係開壞先例呀！葉劉仲話，呢單嘢一出，個個建制派都想知自己「值幾多」添！言談間，有行家就笑指葉劉嘅大弟子容海恩唱歌，都應該值得有捐款，葉劉就好讚同，直言「咪係囉！」又話今次補選民建聯都有「汗血功勞、零的突破」，反問「咁阿舜值幾多錢呀？」睇嚟有學者就講中咗，今次事件真係引起建制派嘅「酸葡萄」反應喇！其實Jenny覺得，唔使「葡萄」吖，睇返以前其他建制派黨慶，幾隻大字都唔止三、五萬啦！Come on take it easy！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇