講咗咁多日，財爺陳茂波（波叔）終於肯喺水浸緊嘅庫房到「唧」咁啲出嚟派街坊喇！波叔今日就公布，會向18歲或以上、無物業、無交薪俸稅、無領取任何津貼同埋未受惠於《預算案》嘅市民派發$4000，係就係少過前財爺曾俊華（鬍鬚曾）嗰$6000一截，但Jenny覺得點都好過冇嘅！起碼冇應驗到小妹上次唱嗰句「從來沒我份，犧牲當做例行，我慣了傷心～～～」先吖！

 

 

波叔終於肯喺水浸緊嘅庫房到「唧」咁啲出嚟派街坊喇!

 

派錢4000 都要等到下年先

 

　　除咗向呢班之前「乜都無」嘅市民「派錢」之外，波叔亦都話嗰啲退稅或者拎到嘅豁免少過$4000嘅市民，都一樣有得補返個差額！但係搞到咁複雜，不如一早就全民派錢算啦！提提大家，其實就算而家話派，要到手都最少要等到下年。

 

　　其實Jenny就估，之前社會對《預算案》個反應咁大，政府其實一早有考慮派錢呢樣嘢嚟平息民怨㗎啦！不過全民派錢點會符合林鄭之前講嘅「理財新哲學」、「投資未來」嗰味嘢吖！所以就整個繁複版嘅派錢方案，又唔會打爛自己招牌之餘，社會又收貨！得咗！

 

改正嘅「功課」 田二少唔收貨

 

　　Jenny仲記得，《預算案》未公布之前，有市民問波叔派唔派錢，波叔就話「諗諗」；公布之後波叔又講到實唔會全民派錢，小妹就覺得政府一早就諗住針對性派錢，所以波叔先係否認「全民派錢」，而唔係否認「派錢」囉！

 

　　Anyway，今次政府肯「轉呔」，肯肯定多咗人支持呢份已改正嘅「功課」，但點都仲有人唔鍾意嘅！就好似實政圓桌嘅田北辰好直接咁話：「一開先例後患無窮，點收科簡直係無眼睇！」佢話寧願成立一個基金去幫啲有需要人士，令他們盡快脫離福利網好過喇！

 

林鄭係「傲嬌」？！

 

　　而之前都反對派錢嘅公民黨就話，唔反對政府向啲之前被遺忘咗嘅香港人補漏，但係都係比較想政府著眼了長遠問題多啲囉；而作為立會新丁嘅港島區立法會議員區諾軒就笑林鄭係「傲嬌」（形容一啲口是心非、外冷內熱、為掩飾怕醜而扮高傲嘅人），又想派錢又唔肯直接做，用呢個派錢方法反而令人無所適從囉！不過區諾軒用到「傲嬌」呢個字，Jenny相信無論係小妹定係廣大讀者，大家一聽到都打咗個冷震先囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇