收藏文章 

2018-04-03

林鄭復活節不停工 幾日假期去咗邊?

復活節大拿拿有成4日假期,唔知大家去咗邊度玩呢?Jenny就見到特首林鄭都過得幾充實咁噃!唔係去旅行,而係全部都係公事!事關佢去咗大灣區、「行」港珠澳大橋,星期日又去咗將軍澳睇單車賽,仲post咗唔少相上Facebook添!

 

 

「行」港珠澳大橋

 

  其實林鄭去大灣區同港珠澳大橋係for考察嘅,仲拉埋一大班局長(創科局局長楊偉雄、教育局局長楊潤雄、政制及內地事務局局長聶德權同埋食衛局局長陳肇始)齊齊去添!林鄭去完主持中大喺深圳嘅祥波書院成立典禮之後,又去咗睇中山國家健康科技產業基地同埋翠亨新區。

 

  第二日,即係3月31日星期六,佢又同運房局局長陳帆去「行」港珠澳大橋。林鄭仲特登出post介紹,自己喺月頭「已經『行』咗連接大橋嘅香港段,今日係從珠海出發『行』珠海段」,仲話「兩次視察讓我親身感受到大橋嘅宏偉,工程嘅艱巨,要向所有工程人員致敬」喎!之不過咁啱假期一完,就爆出大橋其中一個海底隧道出入口人工島懷疑崩塌嘅相,睇嚟離大橋行得嘅時間又遠咗一截嚕!

 

 

 

為牛下女車神打氣

 

  而復活節嘅後半截,林鄭就去咗將軍澳單車館睇國際場地盃單車賽。唔知係唔係要為各位運動員打氣,林鄭都特登著得Sporty啲,仲同各位參加女子精英凱琳賽嘅選手影相,當中仲有「牛下女車神」李慧詩添!

 

  其實林鄭鍾意做嘢就係人都知,所以佢呢堆復活節「活動」都係可以話係寓工作於娛樂,做到嘢之餘又順便當去旅遊,相信大家隔住個mon都feel到林鄭有幾興奮啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#港珠澳大橋 #特首 #牛下女車神 #復活節 #大灣區 #李慧詩
編輯推介
即時報價
全文搜索
Search
最近搜看
新型肺炎
More
Share