收藏文章 

2018-04-09

「音樂椅」轉轉轉 任總管完錢去管股?查太接松崗手!

  Jenny今日收到風,金管局前總裁任志剛(任總)將會接唐家成手,做證監會主席噃!諗返起,任總以前做金管局總裁都做咗16年,小妹細細個就聽過任總個名喇!今次如果真係做證監會話事人,相信視佢為「靠山」同「支柱」嘅林鄭應該最開心。

 

任總一直以來都係林鄭嘅「靠山」同「支柱」。

 

唐家成都有啲退意 任總係時候上喇!

 

  話時話,政府部門同埋官方機構久唔久都會換吓阿頭,不過如果大家有留意開,都會睇到其實來來去去都係嗰班人,例如好似而家嘅商務及經濟發展局局長邱騰華咁,Jenny記得佢做過政府新聞處處長、環境局局長,CY年代佢就做特首辦主任。睇落呢幾個Post都係大纜都扯唔埋,不過喺政府做得AO都係「百搭型」,咩Post都要做,方便政府培養全能型人材吖嘛。

 

  好似金管局、證監呢啲官方機構,「音樂椅」Game一樣都係成日有,事關雖然冇明文寫明機構嘅揸Fit人唔可以連任,不過傳統上都係連任一次就算,加上而家嘅證監會主席唐家成都有啲退意,政府梗係要快啲物色好下任人選喇!之但係去到呢啲權力核心,大家見來見去都會係嗰啲熟悉的名字。今次任總可能坐證監會主席個位,坐完一會之後,或者又去另一個金融機構再坐一會都唔定喇!

 

傳查太做下屆港交所主席 講到似層層

 

  「音樂椅」咁好玩,一於預埋同樣係行政會議成員嘅查史美倫(查太)啦!Jenny聽可靠消息話,佢將會接替周松崗做港交所主席。Jenny仲記得曾聽聞當初林鄭係想搵查太做財政司,一來可以多啲女將入熱廚房,一來又可以踢走前朝個「波」。點知查太餵咗個大檸檬畀林鄭,話冇意入政府,不過都願意繼續做行會成員,叫做留返幾分薄面畀林鄭,今次一齊玩「音樂椅」做埋港交所主席,林鄭應該安樂晒啦!如果消息屬實,數數手指,林鄭競選時所講嘅「金融三靠山」,都一一就位喇!林鄭飲得杯落啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#唐家成 #查史美倫 #行政會議 #金融三靠山 #港交所 #證監會 #特首
編輯推介
即時報價
全文搜索
Search
最近搜看
監管風暴
疫苗福利
More
Share