收藏文章 

2018-04-10

政總跌磚扑親人 係時候執執內籠保幸運

  最近政府似乎唔係幾「老黎」,意外接二連三咁嚟,仲要單單都係關重要基建事!例如號稱已經完成99%嘅高鐵,啱啱試行3日就無啦啦出軌(Well,雖然陳帆局長(帆哥)比較鍾意「甩轆」,話「出軌」令佢諗起啲唔好嘅嘢喎!),結果試行就要Hold住先,等確定晒系統安全後先會恢復喎!轉個身望望條港珠澳大橋,個人工島防波堤又「疑似」被沖散,雖然大橋管理局同路政署人員都先後否認出現安全問題,不過質疑之聲一直冇停過……呢排咁多嘢發生,今日仲連政府自己個總部都出事添!

 

 

enny建議係時候全面檢查吓政總個內籠,執執佢喇……

爭取安全茶水間!

 

  講緊就係今日中午嘅時候,政總一個茶水間(聽講係教育局嗰層)有磁磚剝落,仲擊中一個女職員,要送去醫院治理,Oh No!小妹一直覺得,茶水間可以話係打工仔唯一一個有得唞下嘅地方,如果連呢度都唔安全,叫大家點放心喺度做嘢呢?爭取安全茶水間刻不容緩啊!

 

初落成4個月3意外 

 

  其實政總都唔係第一次出事喇!尤其係啱啱落成嗰年,可以話「鑊鑊新鮮,鑊鑊甘」試過4個月內出現3次意外,包括:

 

  一)喺時任國務院副總理李克強為大樓主持落成儀式之前,就有警員喺西翼做緊高空保安搜查工作嘅時候,踩穿咗暫代假天花嘅木板,跌到重傷;

 

  二)兩個月後有電工就喺相鄰嘅立法會大樓停車場做維修時被電死;

 

  三)之後過咗一個月,有保安員喺東翼地下大堂當值時無啦啦冧假天花,擊中頭部要送院治理。

 

  之後仲爆出特首辦、局長啲私人洗手間同埋Canteen廚房有退伍軍人症桿菌,前教育局局長孫明揚都中咗招要入院!嗰排有唔少人都質疑,係因為時任特首曾蔭權(煲呔曾)想喺新大樓到讀佢最後一份《施政報告》,做第一個「享用」到新大樓嘅特首而急急趕工,搞到新政總同立法會大樓好似豆腐渣咁!今次事隔幾年,又出現跌磁磚嘅意外,除咗唔多「老黎」之餘,會唔會係當初倉促完工嘅惡果又再浮面?Jenny建議係時候全面檢查吓,執執佢喇……

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多言歸政傳文章
你可能感興趣
#特首 #高鐵 #港珠澳大橋 #政總 #茶水間
編輯推介
即時報價
全文搜索
Search
最近搜看
中概股回歸
大國博弈
More
Share