菲律賓人質事件發生至今8年，噚日菲律賓終於肯正式道歉，不過道歉嘅已經唔係當時嘻皮笑臉、死不認錯嘅阿基諾三世，而係而家嘅鐵腕狂人總統杜特爾特。不過，唔係Jenny Harsh，小妹始終覺得，一切其實只係為錢，真心？唔太覺囉！

 

你叫我信你真心道歉？Sorry，做唔到囉！

 

 嗰種忿怒一世唔會忘記

 

　　Jenny仲記得當時負責跟進呢單新聞，由中午開始睇直播到夜晚，初初以為好快可以解決，點知一路睇住菲警幾咁無能，幾咁兒戲地做所謂「救人」行動，然後親眼透過直播望住槍手開槍，領隊謝廷駿滿身鮮血倒臥車門旁，再數下槍聲，子彈穿過車廂而出……死亡直播帶來嘅衝擊可以小妹一世都唔會忘記……嗰種忿怒亦一世唔會忘記……

 

　　杜特爾特今次係非正式訪港，所以冇計劃見香港官員，不過佢就喺一個同菲律賓國民會面嘅場合中，公開地代表菲律賓，衷心就事件正式向中國人致歉，又指事件全屬遺憾，希望以後唔會再有同樣悲劇再發生云云。

 

It's All About Money！

 

　　事隔8年終於有個遲來的「道歉」，雖然係有好過冇，但係一來道歉嘅已經唔係當時嘅阿基諾三世，二來係杜特爾特嘅言行，實在難以唔令人懷疑其實All About Money！

 

　　香港自從人質事件之後，曾向菲律賓發出黑色旅遊警示長達4年時間，就算而家變做黃色，附近嘅東南亞地區都已經相繼變成旅遊熱點，而家都好少見到有菲律賓旅行團了。而呢位杜特爾特總統，就成日都為咗「Money」語出驚人，例如佢星期一（9日）先直接承認親中就係為咗錢：「如果你冇錢，你就唔係我朋友。我去中國事實就係想著錢，我需要錢」（If you do not have money, you are not my friend. I go to China thinking of money because in truth, I need money）；之前亦都話過想變成中國嘅一個省，皆因中國夠有錢。講到咁白，你叫我信你真心道歉？Sorry，做唔到囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情