收藏文章 

2018-04-25

許智峯小學雞搶手機驚動警察叔叔 形象清袋無眼睇!

  今日立法會要恢復撥款條例草案二讀,不過大家嘅重點就被民主黨嘅許智峯搶走咗!事關佢噚日涉嫌搶咗一個保安局女行政主任(EO)嘅手機,今日被人群起聲討!許智峯事隔一日就出嚟向嗰位女EO道歉,並解釋返成件事嘅經過。唉!又有咩用吖!Jenny表示無眼睇呀!

去到大約晚上7點,Madam同阿Sir就來到立會搜證,喺案發現場影相,同埋睇CCTV。

 

 EO電話被搶後嚇到喊

 

  是咁的,噚日一地兩檢法案委員會就要開會,不過大家多數都好少個個坐定定喺度,所以毛孟靜就要求點人數,喺點緊人數嘅時候,許智峯就見到個女職員柄埋一邊拎住文件,又用手機記錄資料咁。

 

  望真啲!原來呢名女職員就係俗稱「狗仔隊」嘅政府人員,職責係監察議員行蹤、幫手叫議員返嚟開會等。許智峯之前都反對開政府用公帑監視議員,認為係侵犯議員私隱,咁佢就問呢位女EO用手機記低咗咩資料,正所謂「你問我唔一定要答」,見對方保持緘默,許智峯就一手拎走咗人哋部手機,入埋去男廁查看,等女EO追唔到入去。Jenny聽法案委員會主席葉劉講,呢位女EO事發之後嚇到喊出嚟呀!

 

許智峯玩出大頭佛 民主黨都唔撐

 

  今次許智峯呢壇嘢,連佢個黨都幫佢唔落喇!民主黨主席胡志偉同Jenny講,呢個行為,無論理由係咩都好,民主黨都絕不接受。Jenny就覺得,許智峯今次咁搶法,小學雞得嚟又冇得益,似係一時之氣下先會做,不過呢個「一時之氣」就超唔抵、同極愚蠢喇!

 

  一來你話人「侵犯私隱」,但你搶人手機仲要入廁所睇,本身咪一樣係侵犯私隱;二來有建制派都同Jenny講,你一個議員搶手機,對方仲要只係一個EO咁大把,你話搶建制派嘅,都可能得到支持者嘅掌聲,但係今次就似係蝦EO多啲囉!呢一搶,搶到成個形象都冇晒啦!

 

  件事鬧到咁大,立法會行管會都話聽日會開個特別會議討論事件。由於事主報咗警,立法會主席梁君彥都批准咗警方入立法會搜證,依Jenny 記憶所及係繼東北撥款、高鐵撥款、青年新政梁頌恆、游蕙禎衝擊立法會之後,再有警察入嚟立法會。今次許智峯一搶衰三瓣,都咪話唔經典(樣衰)喇!

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#許智峯 #立法會 #選舉 #警察 #搶手機 #搶手機 #民主黨 #小學雞
編輯推介
即時報價
全文搜索
Search
最近搜看
恒大困局
跨境理財通
More
Share