補選又來了！不過今次唔係立法會，而係東區區議會嘅佳曉選區。因為當區區議員林翠蓮上年尾因病過身，所以就觸發咗今次補選。

 

望兩望，Jenny覺得植潔鈴同陳穎欣個包裝都幾似！

 

建制又自己打自己友？

 

　　正所謂「地區樁腳好重要，一區都不能少！」，建制派同民主派梗係對個議席虎視眈眈、摩拳擦掌啦！建制就有民建聯「小花」植潔鈴、民主派就有「傘兵」徐子見嘅社區事務主任李鳳琼。不過，林翠蓮嘅助理陳真真就話要延續林翠蓮嘅工作，所以冇理會建制派嘅勸退，喺提名期嘅第一日就報咗名喇！

 

　　講少少背景先，本身林翠蓮曾經係自由黨人，雖然喺2011年退咗黨，但都仲係親建制為主，而陳真真就入過新民黨之後好快就退咗，聽講就係為咗出戰今次嘅補選。牌面上睇，有兩個建制、一個泛民，建制似乎會出現「鎅票」，蝕底啲噃！

 

植潔鈴都玩「雙牌頭」

 

　　唔知係唔係植潔鈴都淆淆地，所以就咋咋臨搵埋工聯會，一齊玩「雙牌頭」，今日好似鄧家彪（Bill）咁，孭住民建聯同工聯會雙重黨籍去報名！但係上次Bill Bill喺新界東，喺冇人鎅票之下，都鎩羽而歸，今次植潔鈴可唔可以成功突圍呢？

 

　　話時話，雖然上次Bill Bill衰咗，但「雙牌頭」呢招唔係冇成功過㗎！喺2015年區選嘅時候，工聯會都喺深水埗出咗位「小花」陳穎欣，撼贏民協大佬馮檢基（基哥）；而黃大仙都有譚美普做代表。佢兩個一樣係擁工記民記雙重黨籍兼贏咗區選，睇嚟「雙牌頭」雖然喺立會選舉唔成功，但係話晒有齊兩大黨源源不絕嘅資源，有齊蛇齌餅，打區選「貼地戰」啲街坊梗係受落啦！

 

成功方程式暫時女性限定！

 

　　望兩望，Jenny仲覺得植潔鈴都幾似陳穎欣添！大家都係十零分界女神頭、大家個區都係老區、大家都係「小花」！不過，大家唔好以為「小花」就好蝦，事關Jenny聽過唔少公公婆婆好鐘意啲後生靚仔靚女，貪佢哋夠似自己嘅孫仔孫女呀嘛！

 

　　睇嚟有啲嘢都係「女性限定」、仲要係「靚女限定」嘅！Bill Bill上次喺新界東未能成功，但Jenny聽講佢好似想轉戰沙田嘅新區噃！雖然唔係「靚女」，但係區選既然有成功例子，睇嚟Bill Bill都有望嘅，但咁咪即係要捨棄佢本身喺離島嘅逸東邨北囉？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情