唔知係唔係因為好日Happy Friday，新民黨同公民黨齊齊搞宴會。新民黨嗰個係7周年黨慶酒會；公民黨嗰個就係12周年籌款晚宴。不過一個就喺會展，一個就喺九展，Jenny表示真係分身不暇呀！

 

 

新民黨呢邊星光熠熠，連特首林鄭月娥同埋政務司司長張建宗都有嚟捧場！

 

Eunice一曲值幾銀？無價囉！

 

　　新民黨呢邊星光熠熠，連特首林鄭月娥同埋政務司司長張建宗都有嚟捧場，表演節目就交畀最唱得嘅容海恩（Eunice)高歌一曲《深愛着你》，葉劉呢位「姐姐」都幾貼心，今次酒會不設籌款環節，咁林鄭就唔會有捐唔捐錢、同埋捐幾錢嘅壓力。話時話，Eunice 條裙又幾靚，不過本身已經係高人嘅佢，再著埋高踭鞋，即刻高過葉劉成個頭⋯響會場可謂超級突出！

 

湯家驊AY再次握握手 雙方冇以後？

 

　　相比之下，公民黨就冇咁好待遇啦！Jenny最多都係見到大主席梁君彥、建制派班長廖長江同埋陳克勤......

 

　　不過，最juicy 可謂見到早已經同公民黨分道揚鑣嘅湯家驊現身！佢同佢徒弟楊岳橋（AY）握手呢吓，謀殺咗唔少攝記嘅菲林，有行家仲講笑話係「大和解2.0」！AY就連連否認：「唔係，我哋本身都冇...」冇？冇咩先？但AY都未講完，就行走咗喇......Jenny望住AY背影，究竟二人係咪已經師徒緣盡呢？

 

 

師徒緣盡?未盡?

 

　　Jenny就唔見有咩大粒官員到場喇，唔知係唔係林鄭上次學精咗，所以唔出現呢個籌款晚宴，費事又整多劑「三萬蚊事件」啦！不過就見到近日都算紅人之一嘅個人資料私隱專員黃繼兒（Stephen）。

 

葉劉現身公民黨晚宴玩Photo Booth

 

 　　表演方面，公民黨一眾立會議員齊玩cosplay 跳舞，至於齊唔齊喇喎⋯只可話業餘唔好要求太多！主席梁家傑（傑哥）話都練咗10次嘅（大約啦）⋯

 

　　兩個黨政治光譜唔同嘅政黨同日搞晚宴，雙方都識規矩嘅，AY去左新民黨黨慶酒會致賀，葉劉亦都禮尚往來，去咗公民黨嘅晚宴打個招呼，仲同陳淑莊、余若薇一齊玩photo booth 添！

 

Audrey同Tanya喺自己主場明顯比葉劉玩得放好多。

成品!

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇