收藏文章 

2018-05-03

林鄭又唔肯講「一生一世」 今次唔關公事關私事?

  自從林鄭個個月都去立法會出席半個鐘嘅答問環節後,Jenny都慣咗林鄭久唔久就喺立法會出現,仲差少少就記錯今日個答問大會係平時個答問環節添!

 

 

 

what is 母語?

 

  「粵語究竟係唔係香港人母語?」係近日熱話,所以今日林鄭都係會上被人問咗幾次,而第一個講嘅社福界邵家臻就話自己嘅母語係粵語,問林鄭嘅母語係咩。點知林鄭就唔肯正面答,淨係話呢啲議題係「無風起浪」、「無的放矢」乜乜乜,當邵家臻要求佢正面回答嘅時候,林鄭似乎著著火地咁話「我唔答呢啲無聊問題」!不過可惜林鄭都係用緊粵語嚟回答呢個問題,Jenny覺得如果係用其他語言就更有霸氣喇!

 

  繼邵家臻之後,同屬專業議政嘅梁繼昌同埋葉建源都有問呢個問題,尤其係葉建源問政府有冇貶抑粵語地位嘅時候,林鄭一個字:「冇」!幾有氣勢呀!不過唔知係咪驚講得太實冇彎轉,林鄭即刻就補返句「呢一刻係冇」!氣場即刻弱咗一大截!

 

「一生一世」的「咒語」

 

  之後,林鄭竟然講咗句「咒語」!佢補多咗句「世事會變」,仲話議員成日叫佢承諾啲「一生一世」乜乜乜,係冇辦法做得到喎!呢句咁熟悉嘅說話,Jenny仲記得林鄭喺傳緊前司長袁國強要離政府而去嘅時候,林鄭接受某個專訪時被問袁司長完唔完成到任期,佢勁爆咁答咗句「冇人可以一生一世」,之後袁司長就真係走咗啦!今次就問佢兩文三語個教育政策會唔會改,佢又唔肯講「一生一世」,唔通喺不久的將來又真係要改?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#母語 #粵語 #林鄭月娥 #立法會 #特首 #答問大會
編輯推介
即時報價
全文搜索
Search
最近搜看
雙幣交易
聚焦兩會2024
More
Share