「一地兩檢」法案委員會主席葉劉一早講明要喺今日審完個條例草案，所以今日都好似高鐵咁全速前進，開足8個鐘之餘仲淨係畀人發言1分鐘，都唔怕開門見山直接咁同議員講係為「節省時間」！

你有你民主派不滿舉晒牌嗌口號，我有我葉劉繼續極速表決，當其時場面十分荒謬。

　　雖然一向唔嫁又嫁嘅葉劉今日身體同嘴巴一樣好「誠實」，不過唔代表民主派就會Buy你㗎嘛！但係葉劉一於少理，你有你提規程問題，我有我唔So你！民主派唯有喺官員發言階段繼續大聲嗌規程問題，公民黨譚文豪同議會陣線區諾軒亦都鬧葉劉做法「無賴」、「處事不公」，葉劉就下令保安將二人逐出會議室。人民力量陳志全（慢必）見到即刻走去區諾軒座位前，將張櫈放喺枱上面，阻止保安抬走兩人，又向葉劉抗議：「規程又唔處理，我都忍你好耐喇！」最後連慢必都一樣難逃被逐命運，會議亦都要暫停5分鐘。

葉劉大細超被鬧「扯貓尾」

　　復會之後，葉劉就話要開始傾修正案，但係有議員提出未討論過附表。葉劉就以「附表都係屬條文一部分」，唔畀討論。民主派就引用主席手冊話，主席主持會議要順序審議條文，而家葉劉咁做係違反守則，葉劉都係堅持先審議修正案，再畀議員問其他問題。不過弔詭嘅係，葉劉唔畀民主派提規程問題，但係又畀唔係呢個委員會成員嘅廖長江發表意見。民主派梗係唔妥呢個做法喇！大鬧葉劉咁做即係「扯貓尾」。朱凱廸就喺個位都拍手，大叫「葉太大晒，好嘢」，擺明串葉劉。唔知葉劉係咪惱羞成怒，反鬧朱凱廸嘅動作係「無賴行為」，廸廸仔就咁就被逐喇！

　　上午個會就咁就完咗，下午返到嚟就開始傾修正案喇。其實個委員會由建制佔多數，大家都知實唔會過到啲修正案，不過葉劉可能太心急喇！喺修正案表決階段嘅時候突然宣布，將同一議員提出嘅修正案合併表決，再次引起在場民主派鼓噪，又要暫停會議處理。Jenny心諗，其實咁樣似乎仲嘥多咗時間添啦……

每條表決十幾秒　「姐姐」今鋪可以邀功了

　　再次復會之後，葉劉決定改返逐條表決，不過就每條都係用唔過20秒嘅時間極速表決完，民主派都深知冇晒辦法，唯有喺位大嗌「割地兩檢違憲」口號同埋高舉Banner以示不滿。最終民主派啲修正案全數被否決，而條例草案亦都可以順利喺6月6日上大會恢復辯論。喺議會實力咁懸殊嘅情況之下，梗係葉劉Win呢一仗啦！今次終於可以威畀妹妹林鄭睇啦！跳起Yeah！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇