過往專欄

2018-06-08

立會上演「爭囡」事件葉劉搭錯隔離條線

#囡囡 #立法會 #援交少女 #80後 #容海恩 #李慧琼 #沙中線造假 #葉劉淑儀 #震動朝野 #爭囡 #毛孟靜

　　呢排港鐵沙中線造假一事，學葉劉話齋「震動朝野」！前幾日熱血公民鄭松泰（泰博）就Send咗信去內會，建議尋求立法會以《立法會（權力及特權）條例》委任一個獨立委員會去調查事件，今日內會就討論泰博呢個提議喇！拗餐懵就預咗，點知中途竟然上演「爭囡」事件，就真係估佢唔到喇！

囡囡我叫你一聲囡囡

　　查呢啲涉及公眾利益事嘅嘢，相信大家都唔會點反對，但係大家就竟然喺搵政府，定係搵立法會成立調查委員會去查，呢個位度拗餐懵！

　　不過兩派議員為鬧而鬧都唔係咩新鮮事，建制就想政府成立一個由法官領導嘅獨立調查委員會調查，話有效過立法會做。民主派就唔同意，話呢件事非同小可，政府查唔查係政府嘅事，立法會一樣有權去查啫！Jenny聽到都滴咗幾滴汗，其實學網民話齋：Why not both！大家打和啦Super！

　　新民黨嘅容海恩（Eunice）當然力撐由政府去查，而緊接住Eunice發言嘅毛孟靜（Miss Mo）就話醒起「呢位囡囡」嘅金句（之前Eunice講過「我覺得議會內外都唔應該牽涉太多政治」）……作為Eunice師傅嘅葉劉聞言竟然極大反應，即刻要Miss Mo澄清：「邊個『囡囡』呀？」唔通葉劉呷醋？而Miss Mo一聽到都即刻失笑，內會主席李慧琼（琼子）都笑住叫Miss Mo澄清係講緊邊個，Miss Mo都大方話：「容海恩，我喺Lift見到佢都會叫佢囡囡嘅，佢知㗎！」

三個阿媽一個囡葉劉諗錯隔離「囡」

　　唔知Eunice係咪驚師傅嬲嬲豬，都叫Miss Mo澄清「囡囡」係咩意思，Miss Mo聽到搲晒頭，就叫Eunice出個選擇題，講吓「囡囡」有邊幾個意思。Eunice就話其實有套講援交少女嘅戲叫《囡囡》，所以想知Miss Mo所講嘅係邊個意思，引到Miss Mo又失笑。

　　琼子都頂唔順喇，叫Eunice唔好再辯論咩係「囡囡」，亦都叫Miss Mo應該叫返議員個名好啲。呢個時候，葉劉又開金口：「根據議事規則，大家唔好用啲貶損嘅形容詞」，Miss Mo一聽到O晒咀，話完全唔明點解「囡囡」變咗「貶損」喎！呢兩位媽媽係到爭拗咩係「囡囡」，搞到另一位媽媽琼子都無晒符！

　　其實Miss Mo平時見到各位行家，都係「阿囝」、「阿囡」咁叫，都只係一個親暱嘅稱呼，葉劉你諗多咗喇！