自從查史美倫喺今年4月上任港交所主席之後，雖然仍然兼任金融發展局主席一職，不過都只係做到搵到接班人為止。而今日政府就公布咗新一任金發局主席人選喇！原來就係做過林鄭競選辦副主任嘅李律仁，喺下星期三（11號）正式上任，任期去到下年嘅1月16日。

特首選戰時作為競選辦副主任嘅李大狀常伴林鄭左右。

李律仁曾是財庫局長大熱

　　其實林鄭上年組班嗰陣，聞說都有諗過請李律仁做財經事務及庫務局局長一職，因為李律仁雖然任職大律師，但就係主打證券、金融等相關嘅官司，不過當時佢就掛住「升仙」（申請做「資深大律師Senior Counsel」），所以就無意加入政府。林鄭雖然好想、好想、好想（很重要要說三次）佢個新班子有多啲新面孔，但係被人餵檸檬又可以點呢？結果就係由上屆嘅財庫局副局長劉怡翔「坐正」，成為新班子中年紀最大嘅問責官員。

特首選戰曾撐曾俊華 最後轉投林鄭陣營

　　不過李大狀最後都係「升仙」失敗，而上年有幸「升仙」嘅，就只得同佢來自同一個辦事處嘅陳樂信。唔知係唔係林鄭都睇準呢個時機，所以再次伸手招攬呢？呢度Jenny同大家講過小故事，就係其實李大狀曾公開支持曾俊華，不過最後被林鄭招攬咗做競選辦副主任，可見林鄭都幾睇重佢。咁之前做林鄭競選辦主任嘅陳智思，今日都成為行會召集人，李大狀作為副主任，拎返個金管局主席嚟做確唔錯呀！

　　嗱！查太上任港交所主席之後，都有話政府一搵到人就退金發局主席個位，所以政府今年話想將金發局改為獨立於政府嘅「擔保有限公司」，就要等李主席著手處理喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情