年年書展都有唔少政界人物出書，今年張炳良（Anthony）都有份，仲要一出就出咗兩本添，佢笑言自己本身都諗住出一本，點知寫寫吓就愈寫愈多，最後唯有分兩本出。不過佢就講到明新書係冇咩大爆料嘅，只係用返官員角度講吓任內做過嘅嘢咁囉！之但係佢又唔認係一本「回憶錄」噃！咁究竟本書係乜東東呢？Jenny在此賣個關子先，買咗嘅朋友睇完之後不妨同Jenny交流吓！

 Anthony冇做局長之後面對公眾表現relax咗，但官腔就仲未改到喇!

官腔與你常在

　　今日Anthony就為佢本新書開講，個題目叫「我的五年局長生涯」，邀請咗唔少政界中人同埋讀者參加座談會。雖然搞到滿城風雨嘅「一地兩檢」、沙中線醜聞，都係今屆政府引爆，但係呢啲咁大嘅工程項目，同上屆政府點都脫不了關係！而且古語有云：「不在其位，不謀其政」，話唔定Anthony退咗落嚟之後，有好多嘢都會更夠膽講呢！所以Jenny都要嚟聽吓佢點睇呢5年喺政府嘅工作先得！

　　大家都明白就算「不在其位」，卸咗任Anthony都仲係唔可以披露政府嘅保密資料，不過普通發表意見、批評就無問題嘅！就好似前立法會大主席曾鈺成咁都幾好呀！但係Jenny就見到Anthony都仲未擺脫到官腔，問佢沙中線衰咗幾個站，調查委員會只查紅磡站足唔足夠，佢只答委員會會查埋監管嘅責任；問新鉛水事件，佢就話唔掌握，淨係叫政府做返啲抽驗……唔通一日做過官，一世都改唔到嗰份官腔？

「局長」我叫你一聲「局長」

　　不過改唔到嘅唔只Anthony，Jenny亦都發現喺座談會嘅大家都一樣改唔到口，對住Anthony仲係「局長、局長」咁嗌，唔知現任嘅陳帆聽到，會唔會Sad Sad豬呢？如果兩位同場出現，唔知場面會點呢……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情