近排大台有套講BB嘅小品電視劇激起唔少「港媽」共鳴，成為話題之作！有小朋友對於老一輩嚟講無疑係喜事，不過香港青年協會嘅調查就發現，雖然有七成受訪者都覺得理想中嘅家庭應該有兩名小朋友，不過問到預計自己會生幾多個，就變咗得一半人打算真係生兩個，唔少人都係覺得自己生一個就夠，有成兩成受訪者仲話唔打算生小朋友添！

 

 

冇樓冇BB？

 

　　時下年輕人係唔係都唔鍾意小朋友，所以唔想生呢？青年創研庫「社會與民生」組別召集人葉梓聰，同埋成員林偉豪就話「非也、非也」，事關佢哋嘅調查都有問到有關問題，原來只係得5.8%受訪者覺得理想嘅家庭唔需要有子女，至於嗰兩成唔打算生小朋友嘅受訪者，超過七成認同「養育子女需要花費很多金錢」，六成認同係「教養子女責任太大」，近五成半認同係因為「房屋問題」。睇嚟「錢」同「屋」，都係年輕人生唔生小朋友嘅最大障礙！所以就算平均每個受訪者理想係生育1.84個B，但係預計生育子女嘅平均數，都係得1.41個啦！

 

　　Jenny仲好有印象，由家計會呼籲「兩個就夠晒數」，到而家只叫大家「預先計劃好，想生幾個心中有數」，已經可以見到呢幾十年嚟政府喺生育政策方面有咩轉變。事關以前就話戰後嬰兒潮來臨，所以先要控制人口增長；而家人口老化咁勁，一對夫婦生兩個都只係補足到個更替水平，但係2016年香港嘅生育率先得1.2，政府都咪話唔頭痕喇！

 

青年創研庫「社會與民生」組別各位成員都慨嘆而家年輕人因為經濟原因而唔敢生仔。

 

而家兒女債點只400萬

 

　　不過，時下年輕人都擔心，喺香港物價水平咁高，噚日先講緊有二手居屋嘅成交價去到過千萬，睇返自己都未顧得掂，仲邊敢生小朋友呀！Jenny身邊都有唔少姐妹同樣都煩惱緊呢樣嘢，你睇吓李麗珊（珊珊）十幾年前話緊嘅「要養大一個小朋友，原來要成400萬」，到而家計埋通脹，一個600萬都唔知埋唔埋到單……

 

　　Jenny都諗起，其實人一世最難還嘅債，都非兒女債莫屬！所以都要學政府講返句：生定唔生？養得到先好生！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇