收藏文章 

2018-07-31

容海恩開行Turbo結婚生B 與姑仔袁彌明隨時不和?

  不認不認還雖認,今次仲可能係開行Turbo結婚生B一條龍!可喜可賀呀!講緊嘅係新民黨容海恩(Eunice))同佢個黨嘅政策總裁袁彌昌,可靠消息人士指二人疑似「BB來了」,下個月就拉埋天窗喇!呢單喜事噚晚一爆出嚟,即刻成為政圈熱話!所以Jenny同行家們梗係四出八卦八卦啦!原來麥美娟(Alice)將會成為姊妹之一!不過Jenny就已經開始關心佢婚後生活喇!

 

Eunice喺facebook post 過同袁彌昌「飯聚」嘅相,睇吓佢笑得幾sweet!(利申:電燈膽係Jenny加落去嘅!)

 

Eunice破單身女議員「不婚」詛咒

 

  一直以來單身女將入議會,幾乎就等同與姻緣說再見,皆因佢哋比其他職業女性工作更忙,極難搵對象,就算有對象都未必有時間陪對方,例子之一就係陳淑莊(Tanya)入咗議會之後,因為太忙,由朝到晚開會覆Call,最後與男友「英雄哥」分手收場。咁點解男議員就好似易咁多搵對象?Jenny只能說句:「男女有別」喇!玄機大家自己參透下啦!

 

  而家Eunice將會係首位喺任內結婚嘅女議員,可以講係為立法會「盛女」帶來好兆頭!據Jenny打探,Alice將會做Eunice嘅姊妹,咁即係知道Eunice嘅大日子係邊日啦?係咪「BB來了」?Alice就通通「封口」話要留返畀主人家公布。

 

「奉子成婚」又如何?

 

  主人家Eunice就話,而家積極籌備結婚嘅嘢,只會搞個小型婚宴,請相熟親友同政界人士出席。大家都好期待Eunice公開幾張Pre-wedding相畀大家睇睇,但佢就話仲未影啊。Jenny就覺得下個月就註冊咁急,影唔切都好正常!咁生BB呢?佢淨係話,年紀唔細,最緊要順其自然,「做完一樣先一樣」……咁即係而家冇BB?定係未夠三個月怕「小器」,唔公開得住呀?

 

  Jenny諗諗吓,如果有BB,都冇違反「做完一樣先一樣」呢句吖,因為點都係下個月結咗婚先,BB就7、8個月後先出世嘛!現代人「奉子成婚」真係好平常,最重要係雙方真心相愛,又有能力照顧BB!

 

姑嫂分屬兩陣型 隨時「火花四濺」?

 

  Jenny仲記得Eunice同袁彌昌緋聞傳出之後,有時做採訪撞到二人其中一個的話,都會多口問兩句,由初初唔知點答,扯開話題,到後來雖然冇公開戀情,但一提起對方都總係嘴角含情,行家都當佢地默認咗喇,只係Jenny同好多政界人士都一樣,勢估唔到二人會玩閃婚!

 

  嗱!Eunice就即將嫁入袁氏家門,大家唔知仲記唔記得袁彌昌個阿妹係邊個呢?就係做過人民力量主席的袁彌明。兩兄妹政治取態唔同,但始終有血緣關係,政見不同都冇話鬧交反面。Eunice都係建制派,仲要係葉劉愛將,第時入咗門,家庭聚會點都會同袁彌明碰面,到時呢對姑嫂唔知會有咩火花呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#袁彌明 #立法會 #葉劉淑儀 #姑嫂 #BB #BB來了 #閃婚 #麥美娟 #容海恩 #袁彌昌 #婚後生活 #不婚 #奉子成婚 #職業女性
編輯推介
即時報價
全文搜索
Search
最近搜看
恒大困局
跨境理財通
More
Share