收藏文章 

2018-08-02

亞運劍擊代表隊「小鮮肉」大放送 最怕係......

  嚟緊18號就係四年一度嘅亞運會喇!係咁多個體育項目入邊,Jenny重點留意嘅項目一定有劍擊份!事關呢項運動要優雅有優雅、要刺激有刺激,最重要嘅係,唔少劍擊嘅運動員都係靚仔靚女嚟嘅!齋係呢樣都夠晒養眼,值得關注啦!

 

 

香港劍擊亞運代表隊共有24人,總教練話希望可以有得「穿金戴銀」。

 

俊男美女輪流出場 林鄭都like

 

  唔止Jenny like劍擊啊,特首林鄭上年去探訪全運會選手村嗰陣,都專登見下劍擊隊,仲讚香港劍擊運動近年發展得非常好,尤其係劍擊運動已進入校園,希望運動員繼續努力。

 

  所以今日Jenny就去咗香港體育學院,八吓我哋港隊劍擊運動員嘅備戰情況!Jenny就最期待睇男子花劍項目,皆因呢個項目今屆港隊代表入面有「少年劍神」之稱嘅張家朗,同埋有「劍擊花美男」之稱崔浩然!淨睇佢哋兩位「小鮮肉」出場,相信唔少女讀者都會心心眼喇!

 

 

「劍擊花美男」之稱崔浩然,係咪靚仔先?

 

江旻憓諗起落敗淚灑當場

 

  劍擊隊總教練鄭兆康就同Jenny講,上屆佢哋嘅成績係八面銅牌,希望今屆可以多返啲顏色咁話喎!佢仲話,今屆最有競爭性應該係男子花劍個人和女子重劍個人嘅比賽。

 

  女子重劍方面,個人賽有佘繕妡同埋江旻憓做代表,鄭教練都好睇好佢哋兩個㗎!其中江旻憓(Vivian)6月嗰陣就係亞錦賽奪金,但係一個月後嘅世錦賽就輸咗。Vivian今日講起呢件事,都忍唔住好自責咁喊咗出嚟,仲覺得自己今日嘅訓練做得唔夠好,但係佢哋教練Tavi都冇鬧佢,仲話「有時都想佢多啲鬧我!」講完自己都破涕而笑添!

 

 

Vivian講講下淚灑當場。

 

  鄭教練就勸勉Vivian,比賽就係唔係贏就係輸,經常都會有升有跌,好似今次6月上咗高峰,7月跌咗落嚟,嚟緊8月或者可以再上高峰!只要學識點樣面對失敗,同埋盡早調節心情就得喇!Jenny非常認同呀!

 

教練最怕食錯嘢 張家朗話唔驚喎!

 

  今次印尼搞嘅亞運,聽講都出現唔少蝦碌事件,好似男足抽籤變鬧劇、選手村係歷屆最細等等……都幾令人擔心。鄭教練話最緊張嘅都係飲食同埋衛生問題,因為運動員嘅飲食好重要,希望大家到時唔好亂食嘢搞到肚痾喎!張家朗反而唔擔心,話相信選手村啲嘢食應該唔會有問題,大家留喺嗰度食就唔怕啦!

 

  香港劍擊隊今個星期日(5號)會去廣州進行最後一次嘅賽前訓練,跟住就會飛去雅加達參賽啦!Jenny真係好期待各位靚仔靚女嘅表現,今次港隊會唔會真係如鄭教練所言,攞多幾面唔同顏色嘅獎牌呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#印尼 #亞運 #港隊 #劍擊隊 #雅加達 #小鮮肉 #運動員 #體育項目
編輯推介
即時報價
全文搜索
Search
最近搜看
雙幣交易
財政預算案2024-25
More
Share