今年父親節政府送咗份「父親節禮物」畀一班將為人父嘅「準爸爸」們，就係向立法會提交咗《2018年僱傭（修訂）條例草案》，建議將法定侍產假由3日加到5日，勞顧會勞資雙方都支持添！大家都諗住實食無黐牙、就算要改都只係有加無減，不過Jenny呢幾日就喺電視聽到有議員大大力咁反對，仲話「侍產假一日都唔應該有」噃！

 

 

舊時、舊時，舊屎應該沖咗落公廁

 

　　講緊嘅就係飲食界立法會議員張宇人，佢近日接受電視台訪問時就大放厥詞，話佢自己本身已經反對有3日侍產假，仲質疑啲打工仔會「永無止境地苛索」：「你以為7日佢哋會收手咩，7日就有14日、14日就有1個月、有1年」。佢又拎埋「舊時」嚟講：「以前我哋冇侍產假又點呢？以前我哋老婆冇產假又點呢？」Jenny聽到呢度就估，以張老闆咁嘅年紀，一定未聽過有首歌係咁唱法：「成日講舊時、舊時、舊時，舊屎應該沖咗落公廁，舊時嘅事有邊個會想知！」（ToNick－－你對我已經唔係好似以前咁）

 

勞工界「團結」齊鬧爆

 

　　張宇人此言一出，梗係引起勞工界一眾人士反彈啦！泛民一方嘅職工盟、工黨都大鬧張宇人嘅講法係「惡人先告狀」；連一樣係建制一員嘅工聯會會長吳秋北，都忍唔住要出嚟講兩句，直斥「廿蚊張又發作」！

 

　　秋北喺社交媒體發炮，話張宇人係「沒有最刻薄，只有更刻薄！」仲細數「以前有汗血工廠；以前有包身工；以前有童工……」、「以前張老闆也還是BB；以前張老闆太太也還是少女；以前張老闆也還未妻兒子孫成群……」諷刺張宇人嘅講法漠視咗時代變遷噃！

 

 

或引發新一輪花名徵求大賽？

 

　　其實張宇人都唔係第一次發表惹火言論㗎啦！佢個好出名嘅花名－－「廿蚊張」，就係當年訂立最低工資時，提議應該將標準定係$20以下，搞到全世界都O晒嘴，有次佢去公開場合仲被人擲20蚊紙抗議添！今日佢又再言出驚人，唔知網民會唔會又起返個新朵畀佢呢？

 

　　不過，話晒張生都係功能組別議員，代表飲食界各位老細，Jenny就只能希望一班幫呢啲老細賣命嘅打工仔自求多福喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇