登革熱疫情有愈來愈嚴重之勢，本地感染個案已升到去19宗，多過之前5年總和，作為惹蚊一族嘅Jenny，近日即使係天氣幾熱都好，總帶定件薄褸出街，行過公園都係披一披穩陣啲！Jenny仲聽聞，醫管局話指必要時會設立登革熱診所。

 

 

大家記得做好防蚊措施呀！無俾蚊咬就冇事可以發生啦！

 

19個患者＝16個去獅子山公園＋3個住長洲

 

　　近排一日之間落完雨又出太陽，出完太陽無耐又落雨，無限Loop，山邊就最易滋生蚊蟲。數數手指，有16個患者曾到獅子山公園，另外3名患者就住長洲，曾經喺花坪路俾蚊咬。獅子山公園而家就封左山，但長洲冇可能封島嘛，所以大家都係小心啲好！

 

初染登革熱 症狀似感冒

 

　　有人同Jenny講「俾蚊針下之嘛！」嘩！登革熱唔講得笑架！嚴重起上嚟會死人！根據衛生防護中心同小妹醫生朋友仔提供嘅資料，有啲人感染咗登革熱病毒後，可以沒有明顯病徵，有啲人會少少發燒等輕微病徵，好多人都以為係傷風感冒，就由得佢「吽」返好，真係Oh My God！

 

　　如果唔好彩有重症登革熱，發高燒之餘仲會有出血症狀，例如皮膚出現瘀斑、鼻或牙齦出血、甚至內出血，最嚴重情況會導致血液循環系統衰竭、休克同死亡。當然有適當同埋及時診治的話，死亡率係不足1%。

 

免急症室「爆煲」 必要時會設登革熱診所

 

　　據Jenny所知，醫管局傳染病及緊急應變中央委員會，聯同衞生防護中心代表，噚晚就登革熱疫情開左個特別會議。啟動「e－登革熱」監察及通報系統，各公立醫院亦增購幾千套登革熱快速測試試劑，以備不時之需。

 

　　醫管局亦考慮到，如果咁唔好彩，有大量登革熱徵狀病人去公立醫院急症室求診，急症室一定「爆煲」，所以建議可分階段開設指定診所，集中診治登革熱疑似病人。小妹就希望，唔需要用到呢個應變措施啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇