民主黨之前嗰個「天下為公」眾籌查梁振英（CY）UGL事件，短短一個星期就籌到目標金額200萬。Jenny睇到呢個速度O晒嘴，估唔到成日被人拆大台嘅泛民都仲咁有號召力！

阿廷肥尹想英國續查CY

　　作為呢個眾籌發起人之一嘅林卓廷（阿廷）同埋尹兆堅（肥尹）上星期三（５日）去咗英國Chur緊嗰邊嘅進度，到而家都未返；不過英國國家打擊犯罪調查局（NCA）就喺上星期六（8日）話已經停止查呢件事，因為呢件事係喺香港發生，唔係英國境內，所以唔屬於NCA負責喎！阿廷同肥尹梗係好失望啦！仲呼籲嗰邊啲議員同埋傳媒關注呢件事，出到群眾壓力呢招噃！

CY使出「誹謗」萬能Key

　　而地球另一邊嘅CY就好興奮咁喇！一連幾日喺Facebook出Post「討伐」阿廷佢哋，今日仲話要學阿廷咁眾籌告返佢哋轉頭添！不過對於CY嚟講，佢一日唔出律師信、唔告人，先至係大新聞囉！所以佢話要告阿廷佢哋，Jenny覺得一啲都唔奇吖！

　　CY話，阿廷佢哋用眾籌「纏繞中傷」佢，所以要以其人之道還治其人之身：「日後我不排除用OPM（Other people’s money）向林卓廷等和他們背後的人討個公道，這是對等和平等。」至於告啲咩，Jenny估計都離唔開「誹謗」呢個萬能Key㗎喇！話晒佢（話）告人誹謗嘅經驗，都係多到數都數唔晒！可以話係Expert啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新etnet健康網購，送你【健骨維他命D3(1000IU)】乙樽(價值$108)► 立即行動！