有史以來襲港最強風暴「山竹」終於走咗啦！不過被「山竹」蹂躪完嘅香港就慘喇！周圍都「此路不通」水浸、冧樹、跌招牌、爆玻璃舉目皆是。教育局噚日下午就快快手宣布咗停課，睇見「山竹」威力如斯強勁，Jenny有唔少住新界嘅朋友直頭停水停電，小妹不禁暗暗希望林鄭可以「先打工仔之憂而憂」，「一錘定音」叫埋停工。

呢張改圖真係刺中一眾打工仔要害!(網上圖片)

林鄭fb群情洶湧求宣布停工

　　可惜，結果係冇嘅！最後林鄭都只係10點幾喺Facebook到叫大家「保持警覺，唔好咁快鬆懈」；今朝政府新聞處仲叫大家「預留足夠時間出行」。所以今日Jenny同一眾打工仔一樣，喺冇巴士、行人路被冧樹封死、半條東鐵線壞咗嘅情況下，都係要繼續返工嘅！Thats why林鄭fb群情洶湧到呢……

　　經過「山竹」半日嘅摧殘，Jenny返到公司，幾乎個個同事都話屋苑嘅樹冧咗一半，大家返工變咗好似行山咁款，仲時時刻刻都好驚又冧一棵壓中自己！特首叫大家「唔好鬆懈」，可惜要返工嘅「工蟻」們又邊有得揀呢？人人只好化身「孖寶兄弟」，玩住障礙賽咁「浩浩蕩蕩」上班去。

全港打工仔 血汗「大遷徙」

　　有位住東鐵沿線嘅姐妹同Jenny呻，因為今日大圍站一邊月台供電系統故障，東鐵線只能夠單邊行車，仲要十分鐘先有一班，即係等成廿分鐘先有架啱佢嘅車，近千個打工仔就係咁樣逼爆大圍站，結果佢就喺大圍站焗咗4個鐘頭「桑拿」先返到公司，妝都溶晒吖，慘慘豬！有個住粉嶺嘅，仲專程北上從皇崗口岸轉巴士到深圳灣口岸，再轉搭西鐵出九龍返工。

　　Jenny返工沿途都見到地面有好多玻璃碎、樹枝等，如果一大風起上嚟都真係不堪設想！諗到呢樣，小妹都要搵返個口罩護一護個靚樣先！行行下仲聽到有行人話：「一跌低就真係『跪玻璃』啦！」呢句說話簡直係笑中有淚……反觀同香港一河之隔嘅深圳、澳門同遭「山竹」蹂躪，交通、基建同樣受損，但係人哋噚日早就講明都停工停課，而香港就只得停課咁大把，政府之前又話要緊貼大灣區嘅？特首可以「特事特辦」就好喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇