香港地，未有得一人一票選特首，都仲有個「民間特首」頂住檔先！不過噚日起，Jenny終於發現「特首」同「民間特首」都有共通之處，就係撐填海喇！

 

 

劉天王喺電影《金雞》客串特首一角深入民心!

「民間特首」：睇落係比較可取！

 

　　話說，噚日團結香港基金又有新片出，今次仲破天荒請到「民間特首」劉德華做旁白添！你知喇，劉天王唔會話請就請到㗎嘛！Jenny印象中除咗幫旅發局同埋某支綠茶之外，劉天王都好似冇乜拍廣告㗎喇！

 

　　劉天王喺條片到大Sell東大嶼人工島方案「睇落係比較可取」、「只要值得做，應該捉緊機會，馬上做」、「想香港繼續向前行，取捨係在所難免」等等，差在未唱埋「東大嶼填海好，好好嘢」咋！據知今次劉天王仲係義務幫手，一蚊都冇收！

 

 

(影片截圖)

下次出埋鏡就Perfect池喇！

 

　　By the way，劉天王雖然少拍廣告，但都有幫海洋公園做保育大使，叫大家關注保護鯨豚教育。雖則基金個報告指填海地帶同江豚同中華白海豚嘅主要棲息地無重疊，但亦有其他研究話有江豚出沒，大家都知填海無可避免會影響到海洋生物嘅棲息地㗎嘛！劉天王呢次出山撐填海，唔少人第一下都覺得：唔怕有角色衝突咩？計Jenny話，劉天王可以再拍多段片同大家解下惑就Perfect池喇！小妹都想見多劉天王幾面呀！

 

　　不過以劉天王嘅魅力，想當年一句「今時今日咁嘅服務態度係唔夠㗎！」都影響咗成個香港服務業十幾廿年，唔知今次呢句「呢個世界真係會有一個百分百完美嘅方案咩？」一出，又會縈繞喺香港人腦海入面幾多年？Jenny就覺得，要學劉天王講句：「今次咁嘅服務態度都係唔夠㗎！」下次至少都要出埋個樣先夠啦！

   

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇