收藏文章 

2018-10-23

崔世安普通話有進步?積極、繼續、經濟都係讀「GG」!

  港珠澳大橋今日終於舉行開通儀式,不過呢個消息都只係上星期先公布,啲行程呀、有咩人出席呀,去到噚日官方先講到。Jenny收到風,唔少行家都因為咁抆水而踢晒腳!

 

 

Jenny諗住安仔苦練普通話終於有進步,點知愈聽愈唔對路!(設計圖片)

 

  踢晒腳還踢晒腳,工還是要返、嘢還是要做的!港珠澳大橋作為千億基建,粵港澳三地政府官員唔出席就唔畀面啦,最大面子係仲有習大大主持儀式。

 

  成個儀式其實真係非常官方,都係各領導輪流致辭咁……終於!Jenny同廣大網民,最期待嘅畫面出現喇!就係聽吓澳門特首崔世安嘅「神級」普通話!

 

以為有進步 點知愈聽愈唔對路

 

  安仔一開頭嗰句「尊敬的習近平主席」都算冇乜點走音,Jenny諗住安仔苦練普通話終於有進步,點知愈聽愈唔對路!「今天我很交星(高興),與哥喂(各位)共聚一堂,共同賤精(見證)港珠oh(澳)die(大)橋開通的歷食食客(歷史時刻)。」Okay,Fine,都尚算認到佢講緊乜,但係去到後段已經愈聽愈估唔到落去,想跪求字幕,以下係小妹聽到嘅:

 

  「拗moon特別醒靜區政府,頂睥GG落事中央的郭香播處」、「鞋手一到,共同為粵港澳die灣區的花剪建車和勞李」、「為紳士袋粵港澳三弟廣die同胞的美好生wood,為中華民族偉大父親的中國夢而blur hi地努力訓豆。射射die渣!」(無獎問答遊戲,答案在文末)

 

乜都讀「GG」,安仔苦衷誰人知

 

  Jenny仲發現,安仔嘅發言入面,無論係「積極」、「繼續」、「經濟」,安仔都一致講成「GG」!安仔呀,知唔知「GG」係點解呀?咁唔「老嚟」,難怪習大大都親林鄭,同佢並肩而行,但就掉低你喺後面喇!所以話,學好普通話係幾咁重要呢!唔係點同大大傾計呢?

 

  Jenny估,係唔係今次大橋開通嘅公布時間太短,安仔嚟唔切準備,結果淨係練到頭半Part呢?點都好,網民畀佢「捍衛粵語第一人」呢個朵,都仲係安仔「囊中物」喇!

 

(答案)

 

「澳門特別行政區政府定必繼續落實中央的部署。」

 

「攜手一道,共同為粵港澳大灣區發展建設而努力。」

 

「為新時代粵港澳三地的同胞得美好生活,為中華民族偉大復興的中國夢不懈地努力奮鬥。謝謝大家!」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【搶先申請】免費試用etnet強化版MQ手機串流報價服務! ► 立即行動

更多言歸政傳文章
你可能感興趣
#大灣區 #特首 #港珠澳大橋 #普通話 #崔世安 #GG #捍衛粵語 #習近平
編輯推介
即時報價
全文搜索
Search
最近搜看
跨境理財通
施政報告
More
Share