廣州有中超「恒大」，上市公司又有間中國恒大(03333)，遲啲香港都有「恒大」啦！不過唔係踢波個「恒大」，而係政府今日公布，恒生管理學院（恒管）要升格做大學，改名叫「香港恒生大學」喇！

上年交Form 今年成功升格大學

　　不過其實恒管話要升格，Jenny都唔知聽咗幾多年，不過校方都係上年先正式向政府交表格，而且聽返嚟嘅消息一向都係正面嘅，所以恒管變「恒大」，都只係時間問題啫！

　　恒管未係「恒管」之前，前身係恒生商學書院（恒商），由恒商到恒管，Jenny都識唔少人喺呢到出嚟㗎！喺A-level年代，恒商仲出唔少狀元添！事關嗰陣時，恒商並唔係而家咁提供學士課程，而係做預科課程，直至「334」新學制開始，恒商先改組，轉為提供學士學位，同埋改名叫「恒生管理學院」。

廣州恒大手下留情啊！

　　Jenny仲記得，以前一到放榜季節，大家嘅焦點都會落喺恒商嗰度，數下佢哋又拎咗幾多支「火箭」，即使係改組前一年，佢哋都喺嗰年高考盡擸4個6A狀元；末代高考都係有4個6A，佢哋都包攬咗3個，難怪一直畀人叫做「A工廠」啦！

　　而家恒管終於變「恒大」，係香港繼樹仁大學之後第二間私立大學，不過Jenny諗起，樹仁當年正名大學嗰陣，啲同學仔都驚簡稱「樹大」又「招風」又「有枯枝」，所以最後簡稱都係叫「樹仁」算鬼數。今次恒管升格做大學，會唔會真係叫「恒大」呢？之但係大家都叫「恒大」，大家提起會唔會撈亂咗上市公司中國恒大；又廣州恒大會唔會告香港恒大侵權㗎？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

WoW WoW星期三：健康網購產品低至$99 (只限今天)► 立即行動