人稱「大Sir」嘅「政壇教父」、前行政會議召集人鍾士元辭世，Jenny收到唔少立法會議員同政界人士對「大Sir」離世表示深切悼念，唔怪得今日立法會都彷彿彌漫住一片哀愁。好敬重大Sir嘅特首林鄭月娥亦發文致哀，佢同鍾士元曾經喺回歸前嘅中英聯絡小組過渡預算案編制專家小組共事過，今個月初仲喺禮賓府同佢搞101歲生日午宴；得知「大Sir」辭世，林鄭代表政府並以佢本人嘅名義，向鍾士元嘅家人致以深切慰問。

 

成功爭取提升立法局民主成分

 

　　大Sir之所以有「政壇教父」之稱，除咗因為佢喺政壇資歷深厚，成就斐然。香港回歸前大Sir已經擔任立法局同行政局議員，佢做過13年嘅立法局議員同16年嘅行政局議員，其中6年仲係同時擔任兩局議員。而喺70年代，佢成功游說到當時嘅港督麥理浩，增加立法局嘅非官守議員數目，令立法局嘅民主成分得以提升。

 

特首林鄭同大sir曾經喺回歸前嘅中英聯絡小組過渡預算案編制專家小組共事 。

 

無懼兩面不是人 只求港人最大利益

 

　　喺80年代中英兩國就香港前途問題進行談判期間，大Sir多次到訪北京同倫敦，更在率團到北京會晤已故國家領導人鄧小平後，被中方點名批佢係英國嘅「孤臣孽子」。大Sir曾經講起呢段舊事，話當時英政府當佢係「走狗」；而中國政府就覺得佢係「漢奸」，即使兩面不討好，但佢都堅持反映港人嘅聲音畀中英雙方知道，為嘅就係唔好對唔住香港人。

 

力撐梁振英任行會召集人

 

　　到1997年回歸，大Sir就喺97至99年間，擔任第一屆嘅特區行政會議召集人；佢認為行會應該年青化，因此力撐當年只係44歲嘅梁振英接班做行政會議召集人。另外，大Sir擔任過唔少公職，包括負責籌辦香港理工學院（現稱香港理工大學）、香港城市理工學院（現稱香港城市大學）同科技大學呢3間高等學府；又做過醫院管理局首任主席，為改革香港公共醫療服務出咗唔少力㗎！

 

　　大Sir本身都係一位傑出嘅工程師，港大First Hon（一級榮譽）畢業，再到英國完成工程博士學位，60年代擔任香港工程協會（即香港工程師學會前身）會長，仲帶領學會成為法定組織。工程界獲獎無數就一定啦，仲研發出新技術，大大減低製造電筒嘅成本。所以話大Sir喺政界、教育、醫療、工程等各方面都咁吃得開，真係不無道理！

 

退而不休 凡事親力親為

 

　　據Jenny所知，大Sir徒弟、曾任前立法局首席非官守議員嘅自由黨創黨主席李鵬飛本來約咗大Sir食飯，但對方話唔舒服未能出席，點知一別成永訣。李鵬飛形容鍾士元為人正直，佢所做嘅一切都係以香港為出發點。至於立法會工程界議員、經民聯主席盧偉國就形容，鍾士元係出色嘅工程師、工業家同教育家，仲透露佢曾經喺鍾士元公司工作，話大Sir凡事都會親力親為，出席活動嘅演講辭全部都係親手撰寫，絕不假手於人。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情