收藏文章 

2018-12-03

金庸小說角色特別郵票 藏李志清未及送上的心意

  武俠小說泰斗查良鏞(金庸)與世長辭,但佢留低嘅小說仍然在唔少人心目中嘅經典,一傾開鍾意邊個小說角色仲會講唔停口。Jenny知道今個星期四(6日),郵政局會出一套以「金庸小說人物」為題嘅特別郵票,原來呢套郵票有段故……

 

 

 

未及送上的心意

 

  呢套郵票係由漫畫家李志清,佢用國畫手法繪畫金庸筆下嘅小說人物,再由設計師賴維鈞設計郵票,印刷調色時特登用金色托底,令郵票更顯精致。李志清先生話,本身繪製呢套郵票時,打算等到發行後就親自為金庸老師送上一套,不過可惜郵票未及發行,金庸老師就已經辭世,佢會將呢套郵票當作對金庸老師嘅紀念,仲話自己好榮幸可以參與製作。

 

  整套郵票共有7個面值,展現嘅角色來自7部家傳戶曉嘅金庸小說,包括《射鵰英雄傳》嘅郭靖同黃蓉($2)、《書劍恩仇錄》嘅陳家洛($2.6)、《笑傲江湖》嘅令狐冲同任盈盈($3.4)、《倚天屠龍記》嘅張無忌($3.7)、《神鵰俠侶》嘅楊過同小龍女($4.9)、《鹿鼎記》嘅韋小寶同康熙($5),以及《天龍八部》嘅喬峯、虛竹同段譽($10郵票小型張)。全部角色買齊只需32蚊唔使,Jenny真係想講句:爭咩爭!全部買晒就得啦!

 

郵票小冊子藏絕世武功

 

  除咗郵票之外,郵政局仲會首次發行包含30枚郵票嘅郵票小冊子,可以睇到張無忌打太極拳嘅畫面活現眼前。Jenny聽講,只要快速翻頁或掃描小冊子封底嘅QR Cord,就可以欣賞到呢套絕世武功嘅連環招式!有興趣嘅粉絲們,就記得星期四去郵局望下喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【搶先申請】免費試用etnet強化版MQ手機串流報價服務! ► 立即行動

更多言歸政傳文章
你可能感興趣
#國畫 #李志清 #金庸 #郵票 #鹿鼎記 #書劍恩仇錄 #射鵰英雄傳 #笑傲江湖 #倚天屠龍記 #神鵰俠侶 #天龍八部
編輯推介
即時報價
全文搜索
Search
最近搜看
監管風暴
恒大困局
More
Share