工展會又嚟啦！聽日就係第一日開幕嘅日子，今日Jenny同大家率先睇下今年有咩優惠，做定功課先！

　　雖然大家睇到大會寫係第53屆，但其實工展會已經有80年歷史。所以今年一於嚟返個80周年大酬賓，一共有8樣荀貨，大家只須$80就可以托返屋企啦，最貴嗰件價值$8000㗎！Jenny忍唔住要唱句:「噢～聖誕節托它歸家～送畀爸媽幾好㗎～」

必搶價值8000蚊福袋

　　呢8樣嘢就包括：價值$1488嘅寶康達時尚寶（多功能飯煲）、$1380嘅卡爾牌壓力煲、$2988嘅家典牌飲用水機、$1496嘅德國博世福袋（有蒸汽熨斗同埋手提攪拌機）、$1592嘅御藥堂保健福袋、$2680南北行「鮑參」福袋，仲有最正嘅係價值$5480嘅美的冷氣機同埋$8000嘅超大福袋，入面有蒸鮮鍋、濾水器、冬蟲夏草、罐頭鮑魚等等，呢個8000蚊福袋係主辦機構準備㗎！

 工展會都有排隊黨

　　樣樣都咁荀，Jenny都好想要呀！不過咁平嘅嘢就梗係有限額喇！上述每樣都係只得8件，先到先得！PR姐姐就同Jenny講，本身大會係喺今晚9時開放排隊，到時會分成8條隊排呢8樣嘢，所以滿64人就會截龍，聽講而家排緊隊嘅人，噚日下晝就出動喇，仲墟冚過上年呀！據PR姐姐透露，而家暫時有30幾人排緊，即係仲有廿幾個位可以排，大家加油喇～

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇