收藏文章 

2019-01-18

林鄭拆彈大細超 當咗泛民透明鳥?

  話說政府收緊長者綜援申領年齡去到65歲嘅新政策搞到全城鬧爆,政府今日終於肯出手補鑊,公布設立返個就業支援補助金,向受到今次政策影響嘅60至64歲、兼健全嘅綜援申請人,提供每個月1060元津貼,啱啱好就等於長者綜援同成人綜援嘅差額。申請人仲毋須額外申請,所以都唔涉及額外行政費。

 

 

  建制同泛民齊齊夾擊一向都好罕有,但係收緊年齡限制呢家嘢,仲要加埋林鄭喺答問大會一句「你哋有份批㗎!」,簡直係神來一筆,建制想鬧少啲都唔得,話晒呢兩年仲要係選舉年呀嘛!你咁講咪即係倒我米!所以好難得地噚日由泛民提出擱置嘅無約束力議案,都得到跨黨派支持。

 

幫建制搶分 社福界議員都冇份

 

  或者就係因為要幫建制「執返啲米」,林鄭喺噚日個議案通過後就約建制派密密斟,Jenny都收到風係傾點樣補鑊。話就話係社福議題,但係就連身為社福界立法會議員邵家臻,同埋立法會福利事務委員會主席鄺俊宇都冇份㗎!仲唔係建制派成功爭取!跳起Yeah!

 

  至於泛民嗰邊就梗係不滿啦!好似公民黨嘅楊岳橋(AY)就質疑,明明立法會係跨黨派同意,但政府就差別待遇,認為應該要一視同仁先啱!不過今日林鄭就話自己會需要主動約見跨黨派議員,但就「唔等於行政長官冇晒去約見個別政黨同議員嘅自由」,仲反問「係咪有少少妒忌或者個心唔係好舒服?」Jenny聽到O晒嘴!

 

有咩留返實施咗先講

 

  不過,林鄭都強調返,跨黨派想就呢個議題會面,佢都盡量會抽時去見,之但係佢嘅行程非常忙碌,呢兩個星期都安排唔到時間出嚟,Jenny數數日子,即係話有咩要講就留返新措施實施咗之後先講?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#就業支援補助金 #長者綜援 #申領年齡 #林鄭月娥 #建制派 #泛民
編輯推介
即時報價
全文搜索
Search
最近搜看
雙幣交易
聚焦兩會2024
More
Share