一連三日嘅農曆新年假期完咗喇！大家今日係咪同Jenny一樣「年初四咁嘅樣」呢？不過Jenny就喺facebook見到同樣係今日返工嘅「大嘥鬼」竟然好開心咁款噃！莫非佢逗咗好多利是？

 

 

成功減廢 開心過「收利是」？

 

　　睇真啲，原來大嘥鬼話今年各個年宵市場除咗回收廢紙、塑膠及金屬外，已經擴展到「全港15個年宵市場回收竹枝、木卡板及未能售出嘅桃花，又新增回收發泡膠、玻璃樽及其他未售出和凋謝嘅花卉，仲喺9個有快餐攤位的年宵市場收集廚餘」。所以當佢收到呢個減廢消息嗰時，仲開心過「收利是」喎！

 

新檯櫈、新層架、新玩具遭用完即棄

 

　　Jenny仲記得，前幾日年三十晚年宵市場結束之後，大嘥鬼仲一直現場直擊回收情況，直落OT到年初一嘅朝早7點添吖！

 

　　依小妹所見，被拋棄嘅物資有檯櫈、層架、帳篷、玩具等等，有唔少都係好新淨，似乎係為咗擺年宵而買返嚟。不過，回收嘅時候係凌晨，唔知多唔多市民去尋寶呢？嗰陣冇去都唔緊要，因為大嘥鬼就話，未能現場分發嘅物資，將運往「綠在區區」或其他地方暫存，之後會透過唔同途徑派發畀有需要嘅公眾人士，大家記得留意住佢嘅社交網頁喇！Jenny今日已經見到大嘥鬼公布有關領取年宵「舊竹」及「護根覆蓋物」（Mulch）安排，大家可以click入呢個網址登記領取：https://goo.gl/forms/kT8ZAtmPVEQxrkXj2

 

維園年宵垃圾少咗38公噸！

 

　　小妹睇返政府資料，原來今年全港15個綠色年宵市場，總共收集約258公噸垃圾，較去年少咗大約72公噸。其中最把炮嘅就係維園年宵喇！今年嗰度收集到嘅垃圾約有58公噸，比去年減少咗38公噸，榮獲今年慳得最多嘅年宵市場！唔怪得大嘥鬼都讚「大家真係好叻叻」喇！不過如果大家擺完攤之後可以執返走啲檯檯櫈櫈重用，又或者直接搬啲舊檯櫈嚟擺檔，用完搬返走，總好過無限量咁送去其他機構啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇