收藏文章 

2019-02-12

大灣區規劃終於嚟喇 宣講會選址海洋公園XXXX?正!

  今日係己亥年第一個行會,特首林鄭一嚟就同記者拜個年,兼好開心咁同大家宣布,大灣區規劃綱要好快就會出台喇!粵港澳三地政府仲會喺下星期四(21日)共同舉辦宣講會,不過被問到會有咩便利措施,林鄭就賣晒關子咁款,話留返宣講會先講喎!搞到Jenny心癢癢呀!

 

(設計圖片)

 

一個推一個 個個都封口 

 

  林鄭唔講唔緊要,Jenny去問其他人囉!適逢今日香港中華總商會(中總)舉行新春團拜,唔少政經人物都會出席,行家首先就問商經局局長邱騰華,佢就耍手擰頭,笑笑口咁話:「去問聶德權啦!」而聶局長就更加係健步如飛,酒會一結束就「嗖」一聲唔見咗人添!而貴為人大常委嘅譚耀宗就話都喺今朝先聽到消息,暫時未收到宣講會個邀請喎!

 

蔡冠深今次終於唔使蝕Book場錢

 

  哼!你哋以為唔講,Jenny就冇辦法知喇咩?Jenny憑著上年嘅經驗,都知今日中總會長蔡冠深喺酒會後會同傳媒拜年,仲會有Q&A時間添!果不其然,蔡會長就大爆早兩個鐘前就已經收到邀請函,寫明宣講會會喺下星期四10點半,喺海洋公園……嘅萬豪酒店舉行!Jenny啱啱聽到頭四隻字都呆一呆,仲以為佢哋都諗住去「威威劇場」度威威添!

 

  話時話,聽講蔡會長之前為呢個宣講會其實都Book過兩次場㗎啦!點知規劃遲遲未公布,佢就要一路取消Booking,訂位錢都蝕埋!如無意外,今次佢終於唔使蝕……啦啩!!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet TV頻道現已登場,多元化財經及消閒影片輪流送上! ► 即睇

更多言歸政傳文章
編輯推介
即時報價
全文搜索
Search
最近搜看
東京奧運
疫苗福利
More
Share