港鐵沙中線嘅醜聞不斷，Jenny由上年聽到而家，雖說政府成立咗獨立調查委員會去查，但係港鐵鑊鑊新鮮鑊鑊甘，民主派議員都係覺得要用俗稱P&P嘅《立法會（權力及特權）條例》，成立個專責委員會跟進下好啲。今個星期立法會大會就又又又再討論用唔用P&P查紅磡站最新嘅工作問題！

次次P&P都被否決

點解Jenny要「又」咁多次呢？無他嘅，其實今次已經係民主派第4次提出用P&P查沙中線㗎啦！不過建制派就覺得有政府嘅調查委員會就夠，加上自從DQ事件後，議會都係建制派佔多，所以動議次次都係被否決。

不過唔係個個建制派都反對動議嘅！一向跟開港鐵議題嘅「田二少」田北辰，喺今日大家仲傾緊個動議嘅時候，就率先出嚟咪兜表態，話自己支持要用P&P，但係就唔投票喇！點解嘅？點解嘅？點解嘅？

二少係人大 要去宣講會啊

二少就解釋返，因為自己係人大代表，要去陣間嘅大灣區宣講會，應該都係趕唔切返嚟投票㗎啦，所以就響咪兜講定畀大家聽先，「立此存照」咁話喎。佢仲估，佢嗰一票應該影響唔到大局(佢都幾心水清！)，但係如果最尾真係差佢嗰一票先至過到，佢會向公眾解釋同埋道歉喎！Umm……如果咁講法，其他議員係咪以後都唔使坐定定投票，淨係「立此存照」就得？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

WoW WoW星期三：健康網購產品低至$99 (只限今天)► 立即行動