自從華為太子女孟晚舟被捕風波之後，大陸同一眾愛國人士就發起聲援華為嘅一連串行動，買返幾部手機梗係唔少得，我哋行會成員加立會議員葉劉淑儀都有響應啊！嗱！尋晚Jenny無意間就睇到一條撐華為嘅片，唔睇猶至可，一睇個嘴就O鬼咗！

中港澳「合拍片」MV

　　原來呢排內地有個合唱團拍咗條MV，講就講「原創公益愛國歌曲」，點知開聲就大唱「華為好～華為美～」、「天下最美的手機」云云。唔係「公益愛國」咩？點解變咗歌頌一間商業機構㗎？Jenny好亂呀！

　　MV入面仲有嚟自香港同澳門嘅小朋友出場，原來係條中港澳「合拍片」！而幕後人員都唔嘢少，作曲嘅係受國務院津貼嘅作曲家鄭冷橫，作詞就係解放軍總政歌舞團詞作家李幼容同埋全國公安文聯簽約詞作家臧思佳。齋睇呢個陣容，Jenny都覺得個MV真係「紅卜卜」，唔怪得一出就紅遍網絡啦！

網友：「自殺式營銷」

　　咁政治正確嘅MV，又有可愛小朋友一大堆，但喺內地都唔係個個讚好。有網民就唔Buy喇，仲話係「簡直自殺式營銷」、「高級黑」、「這種傳到海外不是把華為往火坑裏推嘛！」，仲有人笑條片好有北韓Feel添！嗱！似唔似就見仁見智，只不過Jenny今日搵返條片，佢就已經消失咗，想睇嘅朋友就自己上網Google啦！唔好話Jenny唔提大家，做定心理準備至好！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情