香港地有邊個未受個的士司機嘅氣？唔過海、嫌路程短等等嘅投訴時有所聞，Jenny諗起都一肚氣！自從網約車興起之後，雖然政府就未就呢樣新事物立法，不過市民多咗個選擇，自然少咗揀搭的士。亦都因為咁，從此江湖就多事喇！

Uber Flash一秒變Trash？

　　市民少咗搭的士，即係少咗生意，班的士司機就梗係唔肯過你啦！一直以來的士行業一直追住佢哋嚟打，鬧爆網約車「打爛佢哋飯碗」、「違法白牌車」。而本身今日網約車公司Uber就打算公布新功能「Uber Flash」，推出的士叫車服務，仲真係被佢搵咗間的士車行合作添！其他車行知道之後就大呼：「我哋冇合作空間！」嘩！花生指數大升！

　　所以全世界都等今日記者會食花生。點知劇情峰迴路轉，間車行竟然臨時縮沙，「甩底」唔嚟記者會，下晝拿拿臨出返個聲明，話決定先同的士業界「一同測試新App，並取消與Uber的合作」添！

得返個體戶的士參與

　　梗係啦！家下就好似兩支大學內閣「撼莊」之際，作為莊員之一嘅竟然去追求對家嘅靚女莊員，其他莊員就梗係嬲嬲豬啦！如果繼續落去，話唔定仲踢埋你出莊添！比著Jenny都係收返心養返性好過！

　　Jenny聽聞，呢間車行本身有十幾架的士，而家間車行甩咗底，都仲有啲個體戶的士參與嘅，所以Uber今日都係照常開PC，同埋推出新服務，不過實際上有幾多架的士參與，就不得而知喇！各位，忍多陣啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情